တၢ်မၤလိ ၁၁
တၢ်မၤကွၢ်စီၤအၤဘြၤဟၣ်အတၢ်နာ်
စီၤအၤဘြၤဟၣ်သိၣ်လိအဖိခွါစီၤအံၤစဲး လၢကအဲၣ်ယဟိဝၤယွၤဒီး နာ်န့ၢ်ယဟိဝၤယွၤ အတၢ်အၢၣ်လီၤအီလီၤခဲလၢာ်လီၤ. ဘၣ်ဆၣ် ဖဲစီၤအံၤစဲးအိၣ် ၂၅ နံၣ်ဃၣ်ဃၣ်အခါ ယဟိဝၤယွၤမၢစီၤအၤဘြၤဟၣ် မၤတၢ်တမံၤမံၤလၢအကီလၢအဂီၢ်လီၤ. စီၤအၤဘြၤဟၣ်ကဘၣ်မၤဝဲ တၢ်မနုၤလဲၣ်.
ကစၢ်ယွၤတဲဘၣ်စီၤအၤဘြၤဟၣ်လၢ– ‘လဲၤကိးနဖိခွါစီၤအံၤစဲးဆူ ကီၢ်မိၤရံယၤအကစၢၢ်ခိၣ် ဒီးလုၢ်ထီၣ်အီၤဖဲန့ၣ်တက့ၢ်.’ ဘၣ်မနုၤအဃိ ယဟိဝၤယွၤမၢစီၤအၤဘြၤဟၣ် ဟ့ၣ်လုၢ်ထီၣ်အဖိခွါလဲၣ်န့ၣ် စီၤအၤဘြၤဟၣ်တနၢ်ပၢၢ်ဝဲဘၣ်. ဘၣ်ဆၣ် အဝဲဒိကနၣ်ဝဲယဟိဝၤယွၤအကလုၢ်လီၤ.
လၢခံတနံၤ မုၢ်ဝါထီၣ်ဂီၤဂီၤန့ၣ် စီၤအၤဘြၤဟၣ်ကိးထီၣ်စီၤအံၤစဲးဃုာ်ဒီး အခ့အပှၤခံဂၤဒီး လဲၤဝဲဆူကီၢ်မိၤရံယၤလီၤ. သၢသီဝံၤအလီၢ်ခံန့ၣ် အဝဲသ့ၣ်ထံၣ်စိဝဲကစၢၢ်လီၤ. စီၤအၤဘြၤဟၣ်တဲဘၣ်အခ့အပှၤလၢ အိၣ်ခိးဖဲအံၤ, မ့မ့ၢ်ယၤဒီးယဖိခွါစီၤအံၤစဲး ကလဲၤလုၢ်ထီၣ်တၢ်လီၤ. စီၤအၤဘြၤဟၣ်မၢစီၤအံၤစဲး လဲၤစိာ်သ့ၣ်မုၣ်, မ့မ့ၢ်စီၤအၤဘြၤဟၣ်န့ၣ် လဲၤစိာ်ဝဲဒီလီၤ. ဒီးစီၤအံၤစဲးသံကွၢ်အပၢ်လၢ– ‘ဆၣ်ဖိကီၢ်ဖိလၢ ပကလုၢ်ထီၣ်တၢ်အဂီၢ်န့ၣ်အိၣ်ဖဲလဲၣ်.’ စီၤအၤဘြၤဟၣ်စံးဆၢက့ၤအီၤလၢ– ‘ယဖိခွါဧၢ, ယဟိဝၤယွၤကကတဲာ်ကတီၤန့ၢ်ပှၤလီၤ.’
ဖဲအဝဲသ့ၣ်လဲၤတုၤလၢကစၢၢ်ခိၣ်အခါ တ့ထီၣ်ဝဲတၢ်လုၢ်လီၢ်လီၤ. ဝံၤဒီး စီၤအၤဘြၤဟၣ်စၢထီၣ် စီၤအံၤစဲးအစုဒီးအခီၣ် ဒီးပာ်ထီၣ်အီၤလၢတၢ်လုၢ်လီၢ်အဖီခိၣ်လီၤ.
ဖဲစီၤအၤဘြၤဟၣ် ဟံးထီၣ်အဒီအဆၢကတီၢ်န့ၣ် ယဟိဝၤယွၤအမူခိၣ်ကလူး အကလုၢ်သီၣ်ထီၣ်လၢမူခိၣ်လီၤ. ဒီးစံးဝဲလၢ– ‘စီၤအၤဘြၤဟၣ်ဧၢ, မၤဘၣ်ဒိဖိသၣ်တဂ့ၤ. ခဲအံၤယသ့ၣ်ညါလၢ နနာ်ကစၢ်ယွၤ, မ့ၢ်လၢနသးအိၣ်ဟ့ၣ်လုၢ်ထီၣ်နဖိခွါအဃိလီၤ.’ ဝံၤဒီး စီၤအၤဘြၤဟၣ်ထံၣ်ဝဲ သိဖါတဒုအနၢၤဘျးထီဒီး တပှီာ်အဒ့လီၤ. စီၤအၤဘြၤဟၣ်ဃဲၣ်လီၤကွံာ် ပျံၤလၢစီၤအံၤစဲးအစုဒီးအခီၣ်လိၤ ဒီးလုၢ်ထီၣ်ဝဲသိဖါလၢ စီၤအံၤစဲးအလီၢ်လီၤ.
စးထီၣ်ဖဲနံၤဝဲန့ၣ် ယဟိဝၤယွၤကိးစီၤအၤဘြၤဟၣ်လၢ အတံၤသကိးလီၤ. ဘၣ်မနုၤအဃိလဲၣ်န့ၣ် မ့ၢ်နသ့ၣ်ညါဧါ. ကယဲၢ်တၢ်လၢ ယဟိဝၤယွၤမၢစီၤအၤဘြၤဟၣ်မၤဝဲန့ၣ် အဝဲမ့ၢ်တနၢ်ပၢၢ်ဝဲ လီၤတံၢ်လီၤဆဲး သနာ်က့ အဝဲမၤဝဲလီၤ.
ယဟိဝၤယွၤတဲဘၣ်ကဒီး စီၤအၤဘြၤဟၣ်လၢ အတၢ်အၢၣ်လီၤအီလီၤန့ၣ်လီၤ. ကစၢ်ယွၤတဲဝဲလၢ– ‘ယကဆိၣ်ဂ့ၤနၤ, ဒီးယကဒုးအါထီၣ်နဖိနလံၤ မ့တမ့ၢ် နချံနသၣ်လီၤ.’ ကစၢ်ယွၤအတၢ်ကတိၤအံၤ အဲၣ်ဒိးတဲဝဲအခီပညီလၢ ယဟိဝၤယွၤ ကဆိၣ်ဂ့ၤပှၤလၢအဂ့ၤခဲလၢာ် ခီဖျိလၢစီၤအၤဘြၤဟၣ်အဟံၣ်ဖိဃီဖိလီၤ.
“ယွၤအဲၣ်ဟီၣ်ခိၣ်ဖိတုၤ အဟ့ၣ်လီၤကွံာ် အဖိခွါအိၣ်တဂၤဃီ, ဒ်သိးကယဲၢ်ပှၤလၢ အစူၢ်က့ၤနာ်က့ၤအီၤ တဂၤလၢ်လၢ်န့ၣ်, အသုတဟးဂီၤတဂ့ၤဒီး, ကန့ၢ်ဘၣ်တၢ်မူအထူအယိာ်လီၤ.”—ယိၤဟၣ် ၃:၁၆
တၢ်ဂ့ၤအဂၤလၢ နကဘၣ်သး
ကွၢ်လိမၤဒိးအဝဲသ့ၣ်အတၢ်နာ်
စီၤအၤဘြၤဟၣ်—“ကယဲၢ်ပှၤနာ်တၢ် . . . ခဲလၢာ်အပၢ်”
စီၤအၤဘြၤဟၣ် ပာ်ဖျါထီၣ်အတၢ်နာ်လၢ ကျဲဒ်လဲၣ်. မ့ၢ်နအဲၣ်ဒိးကွၢ်လိမၤဒိး စီၤအၤဘြၤဟၣ် အတၢ်နာ်လၢကျဲဒ်လဲၣ်.
