Abirahamu kwa rongere munwendi Isaka a hare Jehova nokuhuguvara matumbwidiro gendi nagenye. Nye apa Isaka ga kere nonomvhura 25, Jehova kwa pulire Abirahamu a rugane sininke sosidigu unene. Sininke musinke oso?

Karunga kwa tanterere Abirahamu asi: ‘Gusa munoge o ze kondundu Moliya o ka mu gave ngonzambo.’ Abirahamu kapi ga divire eyi Jehova ga mu pulilire a rugane sinininke oso. Nye Abirahamu ga limburukwire Jehova.

Ngurangura zonene, Abirahamu ta katuka a ze novakareli vendi vavali ntani naIsaka. Mezuva lyautatu yipo va ka sikire pepi nondundu Moliya. Abirahamu ta tantere vakareli vendi va ndindire, makura nage naIsaka tava zi va ka zambe. Abirahamu ta pe munwendi Isaka a simbe yitare, ano age mwene kwa simbire mbere. Isaka ta pura oguhwe asi: ‘Nzwi ezi natu ka zamba kupi?’ Abirahamu ta limburura asi: ‘Karunga na tu pa nzwi tu zambe.’

Apa va ka sikire kondundu tava dike sizambero. Makura Abirahamu ta manga Isaka komawoko nokomaguru ta mu tura posizambero.

Abirahamu ta gusa mbere. Poopo ngoso muengeli ta zigire meguru asi: ‘Abirahamu! Kapisi o dipage munoge! Ngesi na yi dimburura asi wa kara nepuro mwaKarunga  morwa ono limburukwa kuzamba munoge.’ Makura Abirahamu ta mono nzwi mosihwa. Ta ditura munwendi nokukareta nzwi a ya zambe.

Kutundilira ezuva olyo, Jehova kwa tumbwire Abirahamu asi mukwawo. Ono diva asi morwasinke? Morwa Abirahamu kwa limburukwire nayinye eyi ga mu tanterere Karunga, nampili ngomu ga dilire kudiva konda zeyi Jehova ga mu pulilire a zambe munwendi.

Jehova ta tumbwidire hena Abirahamu asi: ‘Ngani ku tungika, vana woge ndi ruvharo roge ngaru vhuka.’ Nonkango edi kutanta asi Jehova nga tungika vantu navenye wovawa kupitira moruvharo rwaAbirahamu.