Abrahama naalutile mwanaa hae Isaka kulata Jehova ni kusepa lisepiso zahae kaufela. Kono Isaka hanaanani lilimo zebato eza 25, Jehova naakupile Abrahama kueza nto yeñwi yetaata hahulu. Neli nto mañi yona yeo?

Mulimu ali ku Abrahama: ‘Hakuunge mwanaa hao wa mushimani, yena mwana wa libanda, uyo mueza sitabelo fa lilundu mwa naha ya Moria.’ Abrahama naasazibi luli libaka Jehova hanaa mukupile kuli aeze cwalo. Nihakulicwalo, naautwile Jehova.

Habusa kakusasana, Abrahama aanga Isaka ni batanga bahae bababeli mi baya kwa naha ya Moria. Ka lizazi labulaalu, nebakona kubona malundu kwahulenyana. Abrahama abulelela batanga bahae kuli balibelele, kono yena ni Isaka bazwelapili kuzamaya kuli bayo fa sitabelo. Abrahama afa Isaka likota kuli alwale mi yena ashimba tipa. Isaka abuza ndatahe kuli: ‘Folofolo ikai yeluka eza sitabelo?’ Abrahama aalaba kuli: ‘Mwanaaka, Jehova uka lufa yona.’

Hase bafitile kwa lilundu bayaha aletare. Abrahama atama Isaka kwa mazoho ni kwa mahutu mi amubeya fa aletare.

Abrahama aanga tipa kuli abulaye Isaka. Honafo feela, lingeloi la Jehova lamubiza linze lili kwa mahalimu, lali: ‘Abrahama! Usike waholofaza mushimani! Cwale naziba kuli unani tumelo ku Mulimu kakuli neuitatela kufa mwanaa hao sina sitabelo.’  Cwale Abrahama abona ngu yamuuna yeneswasehile kwa manaka mwa sicacani. Atamulula Isaka kapili mi aeza ngu yamuuna yeo sitabelo.

Kuzwa ka lona lizazi leo, Jehova aba Mulikanaa Abrahama. Kana mwaziba libaka? Abrahama naaezize lika kaufela zanaabata Jehova kuli aeze, nihaike kuli naasika utwisisa libaka Jehova hanaa mukupile kuli aeze cwalo.

Jehova naakutezi hape kusepisa Abrahama kuli: ‘Nika kufuyola, mi nikaatisa bana bahao.’ Taba yeo neitalusa kuli Jehova naaka fuyaula batu kaufela babaeza zelukile bane bakasimuluha mwa lubasi lwa Abrahama.