Abarahama wamudizishili mwanindi Isaka kumukeña Yehova nikukuhwelela yikaninu yaYehova yejima. Ilaña chashikijiliyi Isaka yaaka 25, Yehova wamulejeli Abarahama kwila chuma chakala nankashi. Chumanyi chenochu?

Nzambi wamulejeli Abarahama nindi: ‘Mwani, sendaku mwaneyi wumu hohu weyala wakamulambuli kwikala mulambu hampidi mwiluña daMoriya.’ Abarahama helukili chaletesheli Yehova amuleji nindi eli mwenimuku. Hela chochu, wamwovwahilili Yehova.

Hefuku dalondelelihu nantetemena nankashi, Abarahama wasendeli Isaka niambuñindi ayedi nakuya kuMoriya. Chelili anendi dehi mafuku asatu, atachikili kumona mapidi hahalehi. Abarahama walejeli ambuñindi kumuhembelela hampinji yayiliwu yena niIsaka nakulambula mulambu. Abarahama wasendeli mpoku nawa wamwinkeli Isaka kusenda nchawa. Isaka wamwihwili tata yindi nindi: ‘Chimuna wutukulambula wudi kudihi?’ Abarahama wamwakwili nindi: ‘Mwanami, Yehova wukuloñesha owu chimuna.’

Chashikiliwu hampidi, atuñili kameña. Kuhiñahu Abarahama wamukasili Isaka kumakasa nikunyendu nakumusha hakameña.

Abarahama wanoneli mpoku. Hayoyenoyu mpinji, Kañelu kaYehova wamutambikili iku wudi mwiwulu nindi: ‘Abarahama! Bayi wumwila owu kansi weyala chuma chatamaku! Ichi neluki nami wamukuhwelela Nzambi muloña wunakeñeña kulambula mwaneyi.’  Kufumahu Abarahama wamweni mukoku wachizamba nakobi nseñu muchiputa. Hohenohu wamukasunwini Isaka nawa walambwili owu mukoku.

Kufuma tuhu hanodu ifuku, Yehova wamuteneneña Abarahama nindi ibwambu dindi. Wuneluki chaletesheli? Abarahama welileña chuma chejima chamulejeleñayi Yehova, hela chakwila helukileña chaletesheleña Yehova amuleji nindi eli ochu chumaku.

Yehova wafuntishilihu cheñi chikaninu chindi chamushiikiliyi Abarahama nindi: ‘Nakakukiswila nawa nakakuvulishila anyaneyi.’ Ichi chatalishili mukwila nawu Yehova wakakiswila antu ejima amawahi kuhitila muchisaka chaAbarahama.