Abulahamu wasambilizye umwanakwe Isaki ukutemwa sana Yeova nu kutaila malayo yonsi yakwe Yeova. Nomba lino Isaki wali ni myaka umupiipi na 25, Yeova wanenyile Abulahamu ukucita icintu cimwi icitale sana. I cintu ci cico kwene?

Leza wanenyile Abulahamu ati: ‘Toola umwana wako umonsi wenga sile wino wakwata, uye uku mwamba uwa ku mpanga iya Moliya ukamupeele ilambo.’ Abulahamu ataamanyile umulandu uno Yeova wamuneeniile ukucita vivyo. Nomba uvwiliile Yeova.

Uwanda uwalondeliilepo akatondo, Abulahamu wasenzile Isaki, na aomvi yakwe yaili iyaya uku Moliya. Pa cisila ca manda yatatu yatandike ukulola umwamba katalamukila. Lyene Abulahamu wanenyile aomvi yakwe ukuti yaloleele lino wene na Isaki yafumilepo iyaya ku kupeela ilambo. Abulahamu wanenyile Isaki ukusenda inkwi, nawe Abulahamu asenda umupeni. Isaki uzizye isi ati: ‘Uzye inyama iya kuyapeela ilambo ili kwi?’ Abulahamu nawe aasuka ati: ‘Mwanane, Yeova amatupeela.’

Lino yaafisile pa mwamba, yakuuzile ulambo. Lyene Abulahamu wanyefile Isaki makasa na makulu amwika pa ulambo.

Abulahamu watoozile umupeni. Pa nsita kwene iiya, malaika wapundile ukufuma ukwi iyulu ati: ‘Abulahamu! Utakoma umulumendo! Lyene namanya ukuti wataila Leza pano wali waitemelwa ukupeela  umwanako ilambo.’ Lyene Abulahamu waweni suuku watalemya umu cimuti. Wasapwile Isaki zuwa zuwa apeela na suuku ilambo.

Kufuma pa wanda kwene uwa, Yeova watandike ukwama Abulahamu ukuti a cuza wakwe. Uzye utumanya umulandu? Abulahamu wacisile vyonsi vino Yeova wamunenyile ukucita, nanti cakuti ataamanyile umulandu uno Yeova wamuneeniile ukucita vivyo.

Yeova waswilizyepo ukunena Abulahamu pa ulayo uno wamulavile uwakuti: ‘Ndakupaala, nupya ndalenga anako yavule.’ Yeova walozizye umukuti pa mulandu nu lupwa lwakwe Abulahamu, wali nu kupaala antu yonsi aakacita ivisuma.