Abraham kimachtik Isaac ma kiikneli Jehová uan ma motemachi ipan tlen kiijtojtoya kichiuas. Kema Isaac kipixtoya se 25 xiuitl, Jehová kiiljuik Abraham ma kichiua se tlamantli tlen tlauel ouij. ¿Tijmati tlake kiiljuik ma kichiua?

ToTeotsij kiiljuik Abraham: “Xijuika Isaac, moiyojtsi kone, ipan tlali Moria, uan nopaya xinechmaka keja se tlakajkaualistli”. Maske Abraham amo kimatiyaya kenke Jehová kinauatik nopa, ya kichijki tlen kiiljuik.

Ualmostla ijnalok, Abraham yajki iuaya Isaac uan ininuaya omej itekipanojkauaj ipan tlali Moria. Kema nejnentoyaj eyi tonali, kiuejkaitakej nopa tepemej kampa onasiskiaj. Abraham kiniljuik itekipanojkauaj ma kinchiakaj, pampa inijuantij yaskiaj kimakatij Jehová se tlakajkaualistli. Abraham kiiljuik Isaac ma kiuika nopa kuauitl tlen ika tlipitsaskiaj uan ya kiuikak nopa cuchillo. Isaac kitlajtlanilik itata: “¿Kanke itstok nopa tlapiali tlen titemakasej kej tlakajkaualistli?”. Abraham kinankilik: “Nokone, Jehová techmakas nopa tlapiali”.

Kema asitoj tepeixko kichijkej se tlaixpamitl. Teipa, Abraham kimetsilpik Isaac uan kimailpik uan kitlalik ipan nopa tlaixpamitl.

Kema Abraham kikixtik nopa cuchillo, se iiluikaejka toTeotsij kiiljuik: “¡Abraham! ¡Amo tleno xijchiuili mokone! Nama nijmati nelia tijneltoka toTeotsij pampa kena tijmakaskia mokone kej tlakajkaualistli”. Uajka Abraham kiitak se okichborrego  kuatakantoya kuatsala. Yeka nimantsi kitojtonki Isaac, uan kimakak Jehová nopa okichborrego kej tlakajkaualistli.

Ipan nopa tonali Jehová pejki kiita Abraham kej iuampo. ¿Tijmati kenke? Pampa Abraham kichijki nochi tlen Jehová kiiljuik maske amo kikuamachiliyaya kenke kinauatiyaya ma kichiua se tlamantli.

Jehová sampa kiiljuik Abraham tlen kitenkauilijtoya: “Nimitsteochiuas uan nijchiuas moixuiuaj tlauel ma momiakilikaj”. Nopa kiijtosnejki ika Abraham ichampoyouaj Jehová kinteochiuaskia nochi maseualmej katli kichiuaskiaj tlen kuali.