Abrahán kimachtij ikonetsin, Isaac, maj kitasojta Jiova uan maj takuaujtamati itech nochi tein motenkaua. Sayoj ke keman Isaac kipiaya kemej 25 xiujmej, Jiova kiluij Abrahán maj kichiua se taman tein tel ouij. ¿Tikmati toni kiluij?

Dios kiluij Abrahán: “Ika kualtakayot, xikui mokonetsin akin sayoj setsin uan xiktemakti itech se tepet tein moajsi itech tal Moria”. Maski Abrahán amo kimatia keyej Jiova kinauatiaya nejon, kitakamatik.

Mostika kualkan, Abrahán kiuikak Isaac uan ome itakeualuan itech tal Moria. Eyi tonal satepan, uelik kiuejkaitakej tepemej. Abrahán kiniluij itakeualuan maj mochianij ompa porin yejua uan Isaac yayaj kitemakatij se nemaktil. Abrahán kiuikak cuchillo uan kimakak ikonetsin kouit tein ika taxotaltiskiaj. Isaac kitajtanij ipopaj: “¿Kani yetok tapial tein tiktemaktitij?”. Abrahán kinankilij: “Nokonetsin, Jiova techmakas”.

Keman ajsikej itech tepet, kichijchiujkej se altar. Ompa, Abrahán kimetsijilpij Isaac uan kimaijilpij, uan kitalij itech altar.

Abrahán kikuik cuchillo. Ijkuak, iángel Jiova kiualpanijtoj: “¡Abrahán! ¡Amo teyi xikchiuili telpoch! Axkan nikmati ke titakuaujtamati iuan Dios, porin timotemakak tikmiktis mokonetsin”. Ompa, Abrahán kiitak se ichkaueuet tein motsikoj koujtsalan ika ikuaomiyouan. Yejua ika  niman kitojtomak Isaac uan kimiktij ichkaueuet uan amo ikonetsin.

Itech nejon tonal, Jiova peuak kijtoua ke Abrahán katka itasojikniuj. ¿Tikmati keyej? Porin Abrahán kichiuak nochi tein Jiova kinauatij, maski amo kiajsikamatia keyej kinauatiaya.

Jiova oksepa motenkauak iuan Abrahán: “Nimitstiochiuas uan nikchiuas maj momiakilikan mokoneuan”. Nejon kijtosnekia ke inintechkopa ikoneuan Abrahán, Jiova kintatiochiuiskia nochin akin kuali monejnemiltiskiaj.