Aborahama o ile a ruta morwa wa gagwe e lego Isaka go rata Jehofa le go mmota. Eupša ge Isaka a na le mengwaga e ka bago e 25, Jehofa o ile a kgopela Aborahama gore a dire selo se thata. Selo seo e be e le eng?

Jehofa o ile a botša Aborahama a re: ‘Hle, tšea morwa a nnoši wa gago gomme o yo dira sehlabelo ka yena thabeng ya kua Moria.’ Aborahama o be a sa tsebe gore ke ka baka la eng Jehofa a re a dire seo. Eupša o ile a fo theetša Jehofa.

Mesong ya letšatši le le latelago, Aborahama o ile a tšea Isaka le bahlanka ba gagwe ba babedi gomme ba ya nageng ya Moria. Ba ile ba sepela matšatši a mararo. Ka letšatši la boraro, ba thoma go bonela kgole dithaba tša nageng yeo. Aborahama o ile a botša bahlanka ba gagwe gore ba šale lefelong le lengwe, gomme yena le Isaka ba ya go dira sehlabelo. Aborahama o ile a rwadiša Isaka dikgong tša mollo, gomme yena a swara thipa. Isaka o ile a botšiša tatagwe a re: ‘Phoofolo yeo re tlago go dira sehlabelo ka yona e kae?’ Aborahama a re: ‘Morwa, Jehofa o tla re nea yona.’

Ge ba fihlile thabeng ya Moria, ba ile ba dira aletare. Aborahama o ile a tlema Isaka maoto le matsogo gomme a mmea godimo ga aletare yeo.

Aborahama o ile a ntšha thipa gore a bolaye Isaka ka yona. Ka yona nako yeo, morongwa wa Jehofa o ile a goeletša a le legodimong a re: ‘Aborahama! O se ke wa bolaya mošemane yoo! Ga bjale ke a tseba gore o na le tumelo go Modimo, ka gobane ga se wa gana go dira sehlabelo ka morwa wa gago.’ Ka morago ga moo, Aborahama o ile a bona nku yeo e bego e tantšwe ka dinaka dihlašaneng. Gateetee  a tlemolla Isaka gomme a direla Jehofa sehlabelo ka nku yeo.

Go tloga letšatšing leo, Jehofa o ile a bitša Aborahama gore ke mogwera wa gagwe. Na o a tseba gore ke ka baka la eng? Ke ka gobane Aborahama o be a dira dilo ka moka tšeo Jehofa a bego a mmotša tšona, le ge a be a sa kwešiše gore ke ka baka la eng a swanetše go di dira.

Jehofa o ile a boeletša seo a bego a se tshepišitše Aborahama. O ile a re: ‘Ke tlo go šegofatša, le gona ke tlo dira gore bana ba gago e be ba bantši kudu.’ Seo se be se bolela gore Jehofa o be a tlo šomiša lapa la Aborahama go šegofatša batho ka moka ba go loka.