Abrahán xukʼut chuwach ri ukʼojol ubʼiʼ Isaac ri uloqʼoqʼexik ri Jehová xuqujeʼ che kukubʼsaj ukʼuʼx chrij ronojel ri utzujum. Are kʼu chiʼ Isaac kʼo 25 ujunabʼ, Jehová xubʼij che Abrahán che kubʼan jun jastaq che sibʼalaj kʼax. ¿La awetaʼm jas xutaʼ che?

Dios xubʼij che Abrahán: «Chabʼanaʼ toqʼobʼ, chakʼamaʼ bʼi ri xa jun akʼojol chayaʼ che jun tabʼal toqʼobʼ pa jun juyubʼ rech ri ulew Moria». Abrahán retaʼm taj jasche ri Jehová xutaʼ wariʼ che; pa neʼ retaʼm taj, xnimanik.

Che ri jun qʼij chik, aqʼabʼil, Abrahán xukʼam bʼi ri Isaac xuqujeʼ ri e kebʼ rajchakibʼ pa Moria. Are chiʼ qʼaxinaq chiʼ oxibʼ qʼij, xekunik xkil apanoq ri juyubʼ. Abrahán xubʼij chke ri rajchakibʼ che kkeyeʼj chilaʼ are chiʼ areʼ xuqujeʼ Isaac kebʼe che uyaʼik ri tabʼal toqʼobʼ. Abrahán xubʼij che ri ukʼojol che kukʼam bʼi ri siʼ re ri qʼaqʼ, are kʼu areʼ xukʼam bʼi ri chʼichʼ. Isaac xutaʼ che ri utat: «¿Jachiʼ kʼo wi ri chikop che kqakoj che tabʼal toqʼobʼ?». Abrahán xubʼij che: «Nukʼojol, Jehová kuya chqe».

Are chiʼ xeʼopan pa ri juyubʼ, xubʼan jun altar. Tekʼuriʼ, Abrahán xuxim ri uqʼabʼ xuqujeʼ raqan ri Isaac, tekʼuriʼ xuya pa uwiʼ ri altar.

Abrahán xuchap ri chʼichʼ. Are chiʼ ubʼanom wariʼ, ri ángel rech ri Jehová xubʼij lo pa ri kaj: «¡Abrahán! ¡Kʼot kʼax kabʼan che ri ala! Kimik wetaʼm che kʼo akojonik chrij ri Dios, rumal che xawaj xaya ri akʼojol che tabʼal toqʼobʼ».  Tekʼuriʼ, Abrahán xril jun alaj chij chʼapal ri rukʼaʼ pa taq ri qʼayes. Chanim xukur ri Isaac are xukoj ri alaj chij che tabʼal toqʼobʼ are ta chi ri ukʼojol.

Xumaj lo pa ri qʼij riʼ, Jehová xubʼij che Abrahán are rachiʼl. ¿La awetaʼm jasche? Rumal che Abrahán xubʼan ronojel ri xutaʼ ri Jehová che, pa neʼ kuchʼobʼ taj jasche tajin kutaʼ che.

Jehová xubʼij chi jumul ri utzujum che Abrahán: «Katintewchij xuqujeʼ kinya kʼi awalkʼwal, jun nimalaj awijaʼlil». Wariʼ kraj kubʼij che rumal ri ufamilia ri Abrahán, Jehová kuya utz taq jastaq chke ri winaq che kkibʼan ri utz.