Jehoväta kuyanampaq y änikïninkunaman confiakunampaqmi Abrahanqa tsurin Isaacta yachatsirqan. Peru Isaac 25 watayoqnö këkaptinmi Jehoväqa juk sasa rurëta ruranampaq Abrahanta mandarqan. ¿Musyankiku imata mandanqanta?

Diosqa kënömi nirqan: “Jukllëlla wamrëkita pusharkur ëwë, y Moria nishqan sitiupa juk jirkanchö pishtashqa ofrendatanö qomë”. Imanir tsëta Jehovä mandanqanta mana musyëkarpis Abrahanqa wiyakurqanmi.

Waränin junaqqa, patsa waraqllam Abrahanqa Isaacta y ishkë sirweqninkunata pusharkur Moria nishqan sitiuman ëwarqan. Kima (kimsa) junaq ëwëkarmi jirkakunata rikäriyarqan. Tsënam Abrahanqa sirweqninkunata kënö nirqan: “Isaacwan pishtashqa ofrendata ruraq ëwayanqäyaq këllachö shuyëkäyämanki”. Nïkurmi wamranta yamtata katätsirqan, peru cuchillutaqa kikinmi aparqan. Tsënam Isaacqa papäninta kënö tapurqan: “¿Mëtaq ofrendanapaq kaq animalqa?”. Abrahannam kënö nirqan: “Hïju, tsëtaqa Jehovämi qomäshun”.

Tsëpitanam, tsë jirkaman chäriyarqan y juk altarta perqayarqan. Nïkurnam Abrahanqa chakipita y makipita Isaacta pankarqan, y altar jananman pallarkurqan.

Nïkurmi cuchilluta tsarirkurqan. Peru tsë höram Jehoväpa juk angelnin ciëlupita kënö nirqan: “¡Abrahan! ¡Ama wamrata imanëtsu! Kananqa musyämi Diosman markäkunqëkita, porqui wamrëkita ofrendanëkipaqmi listu këkarqunki”.  Tsëpitanam Abrahanqa rikärirqan juk plantaman yakakashqa këkaq carnëruta. Tsëmi Isaacta jinan höra paskarir, tsë carnërutana ofrendarqan.

Tsë junaqpita patsëmi Jehoväqa nirqan Abrahanqa amïgun kanqanta. ¿Musyankiku imanir tsënö ninqanta? Imanir imatapis mandanqanta mana musyëkarpis llapan mandanqanta ruraptinmi.

Jehoväqa yapëmi Abrahanta kënö änirqan: “Bendicishqëkim y wamrëkim atska kanqa, awmi, mëtsikam mirëniki kanqa”. Tsënöqa nirqan, Abrahanpa familianwan llapan alli portakoq nunakunapaq imëka allikunata ruranan kaptinmi.