Abrahamca paipaj churi Isaactaca Jehová Diosta tucui shunguhuan cꞌuyachun, pai tucui imalla nishcacunapipish crichunmi yachachirca. Isaac ña 25 huatacunata charijpimi Diosca Abrahamtaca shuj sinchi ruranata mandarca, ¿imatashi mandarca?

Diosca Abrahamtaca, ‘cambaj cꞌuyashca shujlla churita pushashpa Moria llajtaman ri. Chaipimi shuj urcuta canman ricuchisha. Chai urcupi Isaacta ñucaman cushpa rupachingui’ nircami. Paica imamanta chaita mandashcata mana intindishpapish cazurcami.

Cayandij punlla utca jatarishpami Abrahamca Isaacta, paipaj ishqui sirvijcunatapish pushashpa chai urcuman rirca. Quimsa punllatami purircacuna. Chaipimi urcucuna ricuri callarijpi Abrahamca paita sirvijcunataca, ‘caipi shuyacuichij. Ñuca churindijmi Diosman sacrificiota cushpa tigramugrinchij’ nirca. Ninata japichina yantata Isaacman apachishpa, paica cuchillota apashpami rirca. Isaacca paipaj yayataca, ‘¿Diosman cuna ovejaca maipitagari?’ nircami. Chaipimi Abrahamca, ‘ñuca huahualla, Taita Dios cungallami’ nirca.

Dios ricuchishca urcuman ña chayashpaca shuj altartami rurarcacuna. Qꞌuipaca Abrahamca chaquicunata, maquicunata tsagnashpami Isaactaca altar jahuapi churarca.

Abraham cuchillota japishpa Isaacta huañuchigrijpimi Jehovapaj angelca jahua pachamantaca, ‘Abraham, cambaj churitaca ama imata ruraichu. Diospi tucui shunguhuan can crij cashcataca ñami yachani. Cambaj churitapish  mana mitsashcanguichu’ nirca. Chai qꞌuipaca Abrahamca shuj carnero yurapi gachucuna churarishca shayacujtami ricurca. Chaimi Isaacta utca cacharishpa chai carnerota japishpa paipaj churipaj randica Diosman cushpa tucui rupachirca.

Chai punllamantami Diosca Abrahamtaca, ‘ñuca amigomi can’ nirca. ¿Imamanta? Abrahamca mana alli intindishpapish Dios imata mandashcatami tucuita pajtachij carca.

Diosca cutinmi Abrahamtaca, ‘cantaca bendiciashami. Achca huahuacunatami cusha. Cambaj huahuacunataca yallitajmi mirachisha’ nirca. Chai shimicunaca Abrahampaj familiamanta tucui alli gentecunata Dios bendiciasha nishcatami ricuchirca.