Abrahanqa yachachiranmi wawanman Jehová Dios munakuyta, promesankunapipas confiayta. Ichaqa Isaac 25 watanpi jina kashaqtinmi Jehová Diosqa Abrahanta kamachiran juj sasa ruwayta ruwananpaq. ¿Imataq chayri karan?

Diosmi Abrahanta niran: “Sapallan wawaykita Moria orqoman apaspa sacrificiopi jaywamuway”, nispa. Abrahanqa manan yacharanchu imarayku Jehová Dios munaran chay ruwananta, chaywanpas kasukuranmi Diosta.

Paqaristin p’unchaymi Abrahanqa tutamantanta jatarispa Isaacwan iskay runankunapiwan Moria ladoman riranku. Kinsa p’unchayta purisqanku qhepamanmi orqota rikuranku. Jinan Abrahanqa iskaynin runankunata niran: “Kayllapi suyawaychis”, nispa. Abrahanwan Isaacllawanñan orqoman wicharanku. Isaacmi llant’ata q’epiran Abrahantaq cuchillota aparan. Jinan Isaacqa papanta tapuran: “¿Maytaq sacrificanapaq borregori?”, nispa. Abrahantaq niran: “Jehová Diosmi qowasun waway”, nispa.

Orqoman chayaqtinkun altarta ruwaranku. Chay qhepamanmi Abrahanqa Isaacta wataspa altar pataman churaran.

Jinan Abrahanqa cuchillota jap’iran, chay ratopin Diospa angelnin janaq pachamanta nimuran: “¡Abrahán! ¡Ama imanaypaschu wawaykita! Kunanqa yachanin Diospi  iñisqaykita, manan wawaykitapas jark’akurankichu sacrificasqa kananmanta”, nispa. Chay ratopin Abrahanqa juj borregota sach’a-sach’api mayt’usqata rikuran, jinan Isaacpa rantinpi chay borregota sacrificaran.

Chay p’unchaymantapachan Jehová Diosqa Abrahanta niran: “Amigoymi kanki”, nispa. ¿Imarayku? Diosta tukuypi kasukusqanrayku, mayninpi manaña entiendeqchu chaypas.

Diosmi jujmanta Abrahanman prometeran: “Bendecisqaykin, jinaspa askha wawakunayoq kapunki”, nispa. Chaywanqa nisharan Abrahanpa familianwan Diosta serviq runakuna bendecisqa kanankutan.