Abrahanga paipa churi Isaactaca Jehová Diosta tucui shunguhuan juyachun, Jehová Dios imacunatalla ruranapi confiachunbashmi yachachirca. Shinapash Isaac casi 25 huatacunata charijpica Jehová Diosca Abrahandaca shinlli, na pactachi ushanalla ruranatami mandarca. ¿Imata rurachunda mandarca?

Taita Diosca Abrahandaca nircami: ‘Cunanga canba shujlla churi Isaacta japishpa, Moria shuti llactapi maijan urcuta ñuca ricuchijpipash, chaipi ñucaman cushpa rupachinguilla’ nishpa. Jehová Dios imamanda shina mandashcata na yachashpapash Abrahanga tucuitami cazurca.

Shina mandashca cayandica tutamandata jatarishpami Abrahanga paita sirvij ishcai runacunatapash, paipa churi Isaactapash pushashpa rirca. Quimsa punllacunata ña rinajujpimi urcucuna carupi ricuri callarirca. Chaipimi Abrahanga paita sirvijcunataca caipi shuyaichi, ñucapash ñuca churi Isaacpash shuj animalta rupachishpa Taita Diosman carangapami rinajunchi nirca. Abrahanga paipa churi Isaacmanmi yamdata apachirca. Cutin paica shuj cuchillota apashpami rirca. Isaacca paipa taitataca tapurcami: ‘¿Diosman cushpa rupachina llamaca maipita can?’ nishpa. Abrahanga nircami: ‘Ñuca huahualla, rupachina llamataca Taita Diosmi caranga’ nishpa.

Moria urcuman ña chayashpaca Abrahanga shuj altartami rurarca. Chaipimi Isaactaca maquitapash, chaquitapash huatashpa chai altar jahuapi churarca.

Abrahán Isaacta ña huañuchigrijujpimi, Jehovapa shuj angelca cielomanda cashna nirca: ‘Paitaca ama imatapash ruraichu’. ‘Canba shujlla churita ñucaman cunata na mitsashcamandami’. Taita Diospi feta charijtaca ña yachani nishpa. Chai jipallami Abrahanga ‘cashapi cachucunahuan jarcarishca shuj jari llamagu shayajujta ricurca’. “Shina ricushpami  Abrahanga, paipaj churipaj randi chai jari llamaguta japishpa Diosman cushpa tucuillata rupachirca”.

Chai punllamandami Jehová Diosca Abrahandaca ñuca amigomi can nirca. ¿Imamanda shina nishcata yachanguichu? Jehová Dios mandashcata na ali intindishpapash Abrahán tucuita cazushcamandami shina nirca.

Jehová Diosca Abrahanmanga cashnami nirca: “Cambaj miraicunamandami, cai pachapi tiaj tucui llactacunaca, bendiciai tucunga” nishpa. Shina nishpaca cazuj gentecunata Jehová Dios Abrahanmanda, paipa familiamandapash bendicianatami nijurca.