O Avraham sikavdža pe čhave, e Isake, te mangel e Jehova hem te verujini ko oljese obećanja. Ama, ked o Isak hine lje koro 25 berš, o Jehova rodindža ando Avraham te čerel nešto but pharo. So valjandža te čerel?

O Devel phendža e Avrahamese: „Molinava tut, lje te čhave e jedinco hem de lje sar žrtva ki jekh planina ki phuv Morija.“ O Avraham na džandža sose o Jehova rodindža ljestar te čerel odova. Ama, hine ljese poslušno.

Tajsato dive, rano sabalje, o Avraham, o Isak hem oljese duj sluge podžindže ki Morija. Palo odova so trin dive dželje phirindoj, dural šaj hine te dikhen o planine. O Avraham phendža peklje slugendže te adžičeren lje dži ov hem o Isak džana te den žrtva. O Avraham dindža e Isakese te akhari o kašta asi jag, a ov ljelja i čhurik. O Isak pučlja pe dade: „Kaj tano o bakro so valjani te da lje sar žrtva?“ O Avraham odgovorindža: „O Jehova ka brinini pe odoljese, mo čhavo.“

Ked reslje ki planina, čerdže jekh oltari. Tegani o Avraham phanlja e Isakese vasta hem ljese pre hem čhivdža lje ko oltari.

Ked o Avraham ljelja i čhurik, tegani šundža sar e Jehovaso anđeo phenela: „Avraham! Ma čer ništa e čhavese. Akana džanava so isi tut vera ko Devel sose hijan lje spremno te de te čhave sar žrtva.“ Palo odova, o Avraham dikhlja jekhe bakre koljese šinga hine zaglavime ko jekh  grm. Ov odmah phravdža e Isake, hem ko oljeso than dindža e bakre sar žrtva.

Kotar odova dive, o Jehova phendža e Avrahamese soj tano oljeso amal. Džaneja li sose? Sose o Avraham hine spremno te čerel sa so rodindža ljestar o Jehova, čak hem ked na haljilo sose valjani te čerel odova.

O Jehova paljem phendža po obećanje e Avrahamese: „Ka blagoslovinav tut hem ka čerav tutar te avel baro potomstvo ja baro narodo.“ Odova značini so o Jehova prekali e Avrahamesi porodica ka bIagoslovini sa e šukar manušen.