Nampianarini-Abrahama avao anakilahiny iny mba ho tea ani- Jehovah noho hatòky ty raha nampitamaniny. Fe lafa 25 tao eo Isaka, le nampanovini-Jehovah raha sarotsy biby zay Abrahama. Ino zay?

Nivola tamy Abrahama Ndranahary hoe: ‘Andeso, zafady, anakilahinao toka iny, le anovo fanatitsy ho ahy amy vohitsy Moria eny.’ Tsy haini-Abrahama mihintsy hoe manino Jehovah ro nampanao azy raha manahaky ani-zay. Fe norihiny avao safàni-Jehovah iny.

Vo maraindray be, le fa nandesiny Isaka miaraky amy mpanompony roe, le nandeha nana Moria any rozy. Lafa afaky telo andro, le nijilon-drozy baka lavidavitsy eny vohitsy iny. Nivola tamy mpanompony rey Abrahama hoe: ‘Linisonareo etoa zahay amy Isaka fa hanao fanatitsy.’ Nampandesiny katà Isaka, fa ie nanday meso. Nanontany Isaka hoe: ‘Baba, aia biby hataontsika fanatitsy zao?’ Le hoy ty navalini-Abrahama: ‘Hameani-Jehovah antsika zay, anako.’

Niavy tamy vohitsy iny eny avao rozy tamy farany, le namboatsy alitara. Bakeo nifehezini-Abrahama ty tanani-Isaka noho ty tombony, le napetrakiny tanaboni-alitara iny teo ie.

Lafa nalani-Abrahama meso iny, le nisy anjelini-Jehovah nikaiky baka an-danitsy any hoe: ‘Abrahama! Ka mandratsy azy! Haiko henanizao hoe mino a Ndranahary vatany iha, kanao fa ho nataonao fanatitsy anakilahinao ’o.’ Bakeo nahita anak’aondry tamy hazo zay teo Abrahama.  Nikavirini-hazo iny ty tsifan’aondry io. Nivahany malaky Isaka, le anak’aondry iny ro nataony soro.

Nikaihini-Jehovah hoe namany Abrahama nanomboky teo. Hainao va ty antony? Nanao ze raha nampanovini-Jehovah azy avao Abrahama, ndre tsy nihainy aza hoe manino ie ro nampanovy ani-raha iny.

Nampitamà ani-Abrahama ho zao ndraiky Jehovah: ‘Hitahy anao aho, ka hataoko maro biby ty taranakinao.’ Nampitamà koa Jehovah hoe baka amy ty fianakaviani- Abrahama ro hahavy ty olo soa hahazo fitahia.