Sa aʻoaʻoina e Aperaamo lona atalii o Isaako, ina ia alofa iā Ieova ma talitonu i ana folafolaga uma. Ae pe tusa o le 25 tausaga o Isaako, na talosagaina ai e Ieova Aperaamo e fai se mea e sili ona faigatā. O le ā lenā mea?

Na faapea atu le Atua iā Aperaamo: ʻFaamolemole ave lou atalii e toʻatasi, ma faaaogā o ia e ofo atu ai se taulaga i luga o se mauga i le nuu o Moria.’ E leʻi iloa e Aperaamo le māfuaaga na faatonu ai o ia e Ieova e fai lenā mea, ae na ia usiusitaʻi pea iā Ieova.

I le taeao o le aso na sosoo ai, na ave ai e Aperaamo lona atalii o Isaako ma ana auauna e toʻalua ma latou ō atu i Moria. Ina ua mavae aso e tolu, na mafai ona latou iloa mamao atu ai mauga. Na fai atu Aperaamo i ana auauna e faatali atu, ae seʻi o la ō ma Isaako e ofo atu se taulaga. Na avatu e Aperaamo iā Isaako ni fafie, ae ia ave se naifi. Na fesili atu Isaako i lona tamā: ʻO fea le manu o le a faaaogā e fai ai le taulaga?’ Na tali mai Aperaamo: ʻLoʻu atalii e, e aumaia lava e Ieova le manu.’

Ina ua la taunuu i le mauga, ona la faia ai lea o se fata e fai ai i luga le taulaga. Ona saisai lea e Aperaamo o lima ma vae o Isaako ma tuu o ia i luga o le fata.

Na tago Aperaamo i le naifi. O le taimi lava lenā na valaau mai ai le agelu a Ieova mai i le lagi: ʻAperaamo, aua neʻi oo lou lima i le tama. O lea ua ou iloa nei e te faatuatua i le Atua, auā na e lotomalie e ofo atu  lou atalii o se taulaga.’ Ona iloa atu lea e Aperaamo o se mamoe poʻa, o loo lavelavea ona seu i se laau. Na tago atu Aperaamo ma tatala lima ma vae o Isaako na saisai, ae aumai le mamoe poʻa ma tapē e fai ai le taulaga.

Na amata mai lava i lenā aso ona taʻua e Ieova Aperaamo o lana uō. Pe e te iloa le māfuaaga? Sa faia e Aperaamo so o se mea na finagalo i ai Ieova, e tusa pe na te leʻi iloa le māfuaaga na faatonu ai o ia e Ieova e fai lenā mea.

Na toe fai atu e Ieova lana folafolaga iā Aperaamo: ʻO le a ou faamanuia iā te oe, ma o le a ou faatoʻateleina lau fanau.’ Na folafola atu foʻi e Ieova o le a ia faamanuiaina tagata lelei uma, e ala mai i le aiga o Aperaamo.