Abraham něněntiro anạe, i Ishak, tadeạu masayang si Yehuwa dingangu mangimang su kěbị dianding Yehuwa. Katewe su tempong umuri Ishak ěndịu 25 su taunge, Yehuwa nẹ̌dorong si Abraham gunang měkoạ sěmbaụ hal᷊ẹ̌ sěbạe tawe gampang koateng. Apa ene?

Mawu naul᷊ị si Abraham, ’Bawạe anạu sarang bul᷊udẹ̌ su ěntana Moria kụ gělị i sie makoạ sasěmbah.’ Abraham běga kawe Yehuwa nẹ̌dorong si sie měkoạ ene. Katewe, i sie tatapẹ̌ timuhụ si Yehuwa.

Diělone mal᷊uka-l᷊ukadẹ̌, i Abraham němaringang si Ishak dingangu darua ělange makoạ sarang Moria. Su katělu ěllone, i sire nakasilo wul᷊udẹ̌ ene bọu marau. Abraham něngoro manga ělange pěngampal᷊ẹ̌ su tempong i sie dingangi Ishak měgělị sasěmbah. Abraham něngoro si Ishak pẹ̌bawa kalu, kụ i Abraham nẹ̌bawa pisọ. Ishak nẹ̌kiwal᷊o, ’Su apa domba sarung koateng sasěmbah?’ Abraham simimbahẹ̌, ’Anạku, hědo Yehuwa měnadia.’

Su tempong i sire nahumpạ su wul᷊udẹ̌, i sire někoạ mezbah. Bọu ene, Abraham něngikị lima dingangu laedi Ishak, bọu ene Ishak nipělọ su wowong mezbah.

Su tempong i Abraham něngal᷊ạ pisọ, malaekatẹ̌ i Yehuwa nẹ̌bera bọu sorga, ’Abraham! Abe pěkoạ apa-apa su anạ ene! Iạ seng nakasingkạ i kau mangimang su Mawu ual᷊ingu i kau mapulu měgělị anạu makoạ sasěmbah.’  Bọu ene i Abraham nakasilo domba kụ sungene nasaung su lelangu kalu dararodọ. I sie langsung němuka tal᷊i nipěngikị si Ishak kụ něngal᷊ạ domba ene nikoạ sasěmbah.

Něnětạ bọu tempo ene, Yehuwa nẹ̌sěbạ Abraham hapị’E. Apa i kau masingkạ kawe nụe i sie nisěbạ kerene? Abraham někoạ apa dẹ̌dorongang i Yehuwa, maning i sie tawe nakaěna alasang i Yehuwa něngoro si sie pěkoạ ene.

Bọu ene, Yehuwa saụ nẹ̌diandi si Abraham, ’Iạ sarung měgělị al᷊amatẹ̌ si kau dingangu měkoạ manga anạu, arau manga hitenu, sěbạe mal᷊awọ.’ Ini mangal᷊ene Yehuwa sarung měgělị al᷊amatẹ̌ su kěbị taumata bọu kěluargang i Abraham.