Авраам оглун Исаакты Иеговага ынак бооп, ооң аазаашкыннарынга бүзүреп чоруур кылдыр өөредип турган. Исаак 25 харлыг турда, Иегова Авраамдан дилег кылган. Кандыг?

Бурган Авраамга: «Чаңгыс оглуңну ап алгаш, Мориа деп черде дагга баргаш, ону меңээ өргүлге берип көрем» — дээн. Иегованың ону чүге дилеп турганын Авраам билбээн. Ынчалза-даа ол ооң чугаазын дыңнаан.

Дараазында хүнде Авраам даң бажында тургаш, Исаакты база ийи кулун эдертип алгаш, Мориа деп черже чорупкан. Үш хонук эрткенде, ыракта даглар көстүп келген. Исаак-биле кады өргүл салгаш, чедип кээрин манаар кылдыр, Авраам чалчаларындан дилээн. Ол Исаакка өрттедир ыяшты тудускаш, боду бижээн ап алган. Исаак ачазындан: «Өргүлге бээр малывыс кайыл, ачай?» — деп айтырган. Авраам: «Оглум, ол дугайында Иегова боду сагыш човаар» — деп харыылаан.

Олар даг кырынга үнүп келгеш, өргүл салыр бедигээшти кылып алган. Оон Авраам Исаактың холу-будун шарааш, өргүл салыр бедигээшке чыттырып алган.

Авраам бижээн тудуп алырга, дээрден Иегованың ангели: «Авраам! Оглуңга хора чедирбе! Сээң бүзүрелиң бар-дыр, чүге дизе чаңгыс борбак оглуңну безин өргүлге бээринге белен болдуң» — дээн. Ынчан Авраам хараганда мыйызы  ызыртына берген кошкарны көрүп каан. Ол Исаакты дыка дүрген чежипкеш, кошкарны өргүлге салган.

Оон бээр Иегова Авраамны өңнүүм деп адап эгелээн. Билир сен бе, чүге? Авраам утказын билбес-даа болза, Иегова чүү-даа дээрге, аңаа дыңнангыр чораан.

Иегова Авраамга база катап аазаан: «Сени йөрээр мен, ажы-төлүң дыка хөй боор». Иегова Авраамның өг-бүлезин таварыштыр хөй-ле эки улуска ачы-буянны көргүзерин чугаалаан.