Abrahamu o funza murwa wawe Isaka u funa Yehova na u fulufhela mafulufhedziso oṱhe a Yehova. Fhedzi musi Isaka e na miṅwaha i ṱoḓaho u vha 25, Yehova o humbela Abrahamu uri a ite tshiṅwe tshithu tshi konḓaho vhukuma. Tshenetsho tshithu ho vha hu mini?

Mudzimu o vhudza Abrahamu a ri: ‘Nga khumbelo, dzhiani murwa waṋu muthihi fhedzi nahone ni mu ite tshiṱhavhelo ngei thavhani ya Moriya.’ Abrahamu o vha a sa ḓivhi uri ndi ngani Yehova a tshi khou mu humbela uri a ite nga u ralo. Fhedzi o thetshelesa Yehova.

Nga matsheloni a ḓuvha ḽi tevhelaho, Abrahamu a dzhia Isaka na vhalanda vhawe vhavhili nahone vha livha Moriya. Nga murahu ha maḓuvha mararu, vha thoma u vhona thavha dzi kulenyana. Abrahamu a vhudza vhalanda vhawe uri vha mu lindele henefho nahone ene na Isaka vha ṱuwa vha ya u ṋekedza tshiṱhavhelo. Abrahamu o vhudza Isaka uri a hwale khuni nahone Abrahamu a dzhia lufhanga. Isaka a vhudzisa khotsi awe a ri: ‘Tshipuka tsha tshiṱhavhelo tshi ngafhi?’ Abrahamu a ri: ‘Ṅwananga, Yehova u ḓo ri fha tshone.’

Vha mbo ḓi swika thavhani nahone vha fhaṱa aletare henefho. Abrahamu a vhofha zwanḓa na milenzhe zwa Isaka nahone a mu vhea kha aletare.

Abrahamu a mbo dzhia lufhanga. Nga tshenetsho tshifhinga, muruṅwa wa Yehova a vhidzelela e ṱaḓulu a ri: ‘Abrahamu! Ni songo vhaisa mutukana! Zwino ndi a zwi ḓivha uri ni na lutendo kha Mudzimu ngauri no vha no ḓiimisela u ita murwa waṋu tshiṱhavhelo.’ Nga  murahu ha zwenezwo, Abrahamu a vhona thutha yo fashiwa nga maṋanga tshiṱakani. A vhofholola Isaka nga u ṱavhanya nahone a ita tshidzimu nga thutha nṱhani ha Isaka.

U bva ḽeneḽo ḓuvha, Yehova o vhidza Abrahamu khonani yawe. Ni a ḓivha uri ndi ngani? Abrahamu o ita zwoṱhe zwe Yehova a mu humbela uri a zwi ite, naho o vha a sa pfesesi uri ndi ngani Yehova a tshi khou mu humbela uri a ite nga u ralo.

Yehova a dovholola zwe a fulufhedzisa Abrahamu a ri: ‘Ndi ḓo ni fhaṱutshedza nahone ndi ḓo ita uri vhana vhaṋu vha vhe vhanzhi vhukuma.’ Hezwi zwi amba uri Yehova u ḓo fhaṱutshedza vhathu vhoṱhe vho lugaho a tshi shumisa muṱa wa Abrahamu.