Abrahaneʼ tu kaʼansaj tiʼ Isaak, u hijo, ka u yaabilt Jéeoba yéetel ka confiarnak tiʼ tuláakal le baʼax ku yaʼalik u beetkoʼ. Chéen baʼaleʼ le yaan kex 25 años tiʼ Isaakoʼ, Jéeobaeʼ tu yaʼalaj tiʼ Abrahán ka u beet junpʼéel baʼax maʼ chéen chʼaʼabil u beetaʼaliʼ. ¿A wojel wa baʼax tu yaʼalajtiʼ ka u beete?

Dioseʼ tu yaʼalaj tiʼ Abrahán: ‹Chʼaʼ le a juntúuliliʼ hijooʼ. Tsʼoʼoleʼ xeen tu luʼumil Moria, tiʼ junpʼéel tiʼ le puʼukoʼoboʼ, utiaʼal a kʼubikten bey junpʼéel tóokbil siibaleʼ›. Kex Abrahán maʼ u yojel baʼaxten aʼalaʼabtiʼ tumen Jéeoba ka u beet leloʼ, tu yuʼubaj tʼaan.

Tuláakʼ kʼiin táan u taal u sáastaleʼ, Abrahaneʼ jóokʼ yéetel Isaak bey xan yéetel kaʼatúul u j-meyajoʼobeʼ, ka binoʼob tu luʼumil Moria. Ka máan óoxpʼéel kʼiin táan u binoʼobeʼ káaj u yilkoʼob le puʼukoʼob desde náachiloʼ. Abrahán túuneʼ tu yaʼalaj tiʼ u j-meyajoʼobeʼ ka u páaʼt u suutoʼob tumen yaan u bin yéetel Isaak u kʼuboʼob junpʼéel siibal tiʼ Dios. Abrahaneʼ tu bisaj le cuchillooʼ yéetel tu tsʼáaj u kuch Isaak le siʼ kun meyajtiʼob utiaʼal le kʼáakʼoʼ. Isaak túuneʼ tu yaʼalaj tiʼ u papá: ‹¿Tuʼux yaan le baʼalcheʼ ken k-kʼuboʼ?›. Abrahaneʼ tu núukajtiʼ: ‹Hijo, Jéeoba kun tsʼáaiktoʼon›.

Le ka kʼuchoʼob teʼ puʼukoʼ tu beetoʼob junpʼéel altariʼ. Ka tsʼoʼokeʼ Abrahaneʼ tu kʼaxaj u kʼab yéetel u yook Isaakeʼ ka tu chikúuntaj yóokʼol le altaroʼ.

Abrahán túuneʼ tu machaj le cuchillooʼ. Jach teʼ súutuk jeʼeloʼ u ángel Jéeobaeʼ tu yaʼalaj desde teʼ kaʼanoʼ: ‹¡Abrahán! Maʼ a beetik loob tiʼ le xiʼipaloʼ. Tumen beoraaʼ tsʼoʼok in wilkeʼ  jach yaan a fe tiʼ Dios tumen ta wóotaj a kʼub a hijo›. Abrahán túuneʼ tu yilaj maʼ sen náach tiʼeʼ tiaʼan juntúul taman leechel u baakoʼob tiʼ junkúul cheʼiʼ. Ka túun tu jáan luʼsaj Isaak teʼ altaroʼ ka tu tóokaj le taman utiaʼal u kʼubik tu lugar u hijooʼ.

Desde teʼ kʼiin jeʼeloʼ Jéeobaeʼ tu yaʼaleʼ Abrahaneʼ u amigo. ¿A wojel wa baʼaxten? Tumen Abrahaneʼ tu beetaj tuláakal le baʼax aʼalaʼabtiʼ tumen Jéeoba kex maʼ tu naʼataj baʼaxten kʼáataʼabtiʼiʼ.

Jéeobaeʼ tu kʼaʼajsaj u promesa tiʼ Abrahán: ‹Teneʼ jach tu jaajil yaan in bendecirkech yéetel yaan in beetik u yaʼabtal a paalal›. Lelaʼ ku yeʼesikeʼ Jéeobaeʼ yaan u bendecirtik tuláakal le utsul máakoʼoboʼ yoʼolal u familia Abrahán.