Icaka onongo tye ki mwaka 40 i kare ma en onyomo Labeka. En onongo maro Labeka adada. I nge mwaki mapol, gin gunywalo lutino awobe aryo ma gin rudi.

Awobi mukwongo kilwongo nyinge ni Ecau, ki dong me aryone kilwongo nyinge ni Yakobo. Ecau onongo maro bedo i tim, dok ladwar makwiri. Ento Yakobo onongo maro bedo gang.

I kare ca, awobi madit onongo kimiye but ngom madit kacel ki lim madwong ka wonne oto. Kilwongo man ni ginaleya. I ot pa Icaka, ginaleya man onongo bene kwako nywako i cobbe pa cikke ma Jehovah omoko ki Abraim. Ecau onongo pe paro pi cikke magi, ento Yakobo oniang ni pigi tek adada.

I nino mo acel, Ecau odwogo gang ma ool adada pien obedo ka dwar pi nino-nu ducu. Ongweyo ngwec dek makur ma Yakobo tye ka tedone ci owacci: ‘Kec mito neka woko! Miya dek ngor makwar ma itye ka tedo-ni!’ Yakobo ogamo ni: ‘Abimiyi, ento kong icikke ni ibimiya ginaleyani.’ Ecau ogamo ni: ‘Pe aparo ginaleyana! Itwero gamone. An amito cam keken.’ Itamo ni Ecau otimo gin me ryeko? Pe kumeno. Ecau ocato gin mo ma pire tek adada pi dek atabo acel keken.

I kare ma Icaka dong oti woko, kare onongo dong oromo pi en me miyo mot bot wode madit-ti. Ento Labeka okonyo Yakobo,  awobi matidine, me nongo mot meno. I kare ma Ecau oniang pi yub man, akemo omake matek ci ogoyo pulan me neko ominne woko. Icaka ki Labeka onongo gimito gwoko Yakobo, pi meno guwacce ni: ‘A woko, icit ibed ki omin mamani, Laban, wang ma akemo pa Ecau okwe woko.’ Yakobo owinyo tam pa lunyodone ci oringo woko pi laro kwone.