Kinde ma Isak ubino ku oro 40, egamu Rebeka. Emare lee dit. I ng’eye, ginyolo awiya ma co ario ma rut.

Nying’ ma kayune ubino Esau, m’ulube ke nyinge bino Yakobo. Esau ubed ubedo ngo i pacu, kum ebino jadwar lei, ento Yakobo ubed umaru nibedo i pacu.

I rundi ma con eca, ka wego utho, jubed jumio podho man sente ni nyathin ma kayu nikadhu mir awiya mange. Jubed julwong’o piny maeno nia giralaga. Ni juruot pa Isak, giralagane ubino bende lembang’ola ma Yehova utimo ni Abraham. Esau ubed uneno lembang’ola maeno ni gin ma tije mbe, ento Yakobo ubed uneno lembang’olane ni gin ma pire tek lee.

Nindo moko, Esau ucidh udwaru lei man edwogo m’eol yere yere. I saa maeno, Yakobo ubino tedo cam moko ma mit. Kinde ma ng’wic camne ugoyo Esau, eyero ni Yakobo kumae: ‘Abecitho ku kec! Mii ira cwe ma kwar m’ibetedo no moko!’ Yakobo udwoko ire kumae: ‘Abimio, re kelar ing’ol ira nia giralaga peri bidong’ ira!’ Esau uyero kumae: ‘Lemoko mbe, ebidong’ iri; mii ira cam kende!’ Nyo iparu nia eno Esau utimo lembe ma cuu? Ungo. Esau ugam ubayu gin moko ma pire tek lee dit, ndhu pi cwej munguk.

Kinde ma Isak utii kobokobo, saa mi mio mugisa ni wode ma kayu ugam uromo.  Ento Rebeka ukonyo Yakobo ma tie wode ma cogo kara en re m’enwang’ mugisane. Kinde ma Esau unyang’ i lembe maeno, ng’ecwiny umake lee, man epangu nia ebinego umin cen. Isak giku Rebeka gimito gibodh Yakobo, e giyero ire kumae: ‘Cidh i bang’ nerumiri ma Laban, man bed i bang’e nitundo ng’ecwiny pa Esau bithum.’ Yakobo uwinjo juk mi junyodo pare, man eringo pi nibodho kwo pare.