Isaacajj 40 maranëjjäna ukhaw Rebecampejj casarasïna. Jupajj wal Rebecar munasïna. Tiempompejj pä ispa (gemelo) wawanïpjjänwa.

Jilïrejj Esaú satänwa, sullkïristi Jacob satarakïnwa. Esaú satäkäna ukarojj campon sarnaqañaw gustäna, animalanak katurirakïnwa. Jacoburojj utankañaw gustarakïna.

Uka tiemponjja, awkin jiwatapatjja jilïr wawaw mayni wawanakat sipansa jukʼamp oraqe qollqe katoqerïna. Ukaruw herencia sasajj uñtʼasïna. Isaacan familiapanjja, Diosajj Abrahanar bendisiñatak arskäna uka promesajj herenciat uñjatarakïnwa. Esaú waynajj janiw Diosan uka promesap yäqkänti. Ukampis Jacobojj wali wakiskiritwa uñjäna.

Mä kutejja, Esaú waynajj animalanak katuri sarasaw wali qarita utar kuttʼanïna. Jacobojj utanwa mä suma manqʼa phayasiskäna, uk muktʼasaw Esaú waynajj akham säna: ‘¡Manqʼat walpun awtjitu! ¡Wila color manqʼamat mä jukʼay wajjtʼita!’ sasa. Jacobojj akham sarakïnwa: ‘Nayraqatjja, herenciam nayar churañatak mä promesa luram’ sasa. Esaú waynajj sarakïnwa: ‘¡Uka herenciajj janiw kunatakis sirvkituti, katusiskamaya! Antisas nayajj manqʼa munta’ sasa. ¿Kamsasmasa, Esaú waynajj yatiñampit uk lurpachäna? Janiwa. Manqʼa laykukiw kunatï wali wakiskirïki uk aptʼasïna.

 Isaacajj wali chuymanëjjänwa, jilïr wawapar bendición churañ tiempos purinjjarakïnwa. Ukampis Rebecajj sullkïr wawaparuw bendición katoqañapatak yanaptʼäna. Esaú waynajj uk yatisïna ukhajja, sullkapar jiwayañ wal munäna. Isaacampi Rebecampejj jan walinakat jarkʼaqañ laykuw Jacobur akham sapjjäna: ‘Mamaman jilapäki uka Labán tioman utapar escapjjam, Esaú jilaman colerap pasayasiñapkama’ sasa. Jacobojj iyaw sasaw escapjjäna, jan jilapan jiwayatäñataki.