Marumur 40 taon ma si Isak tingki mangoli dohot si Rebekka. Mansai holong do rohana tu si Rebekka. Tubu ma dua anak ni nasida. Kembar do na dua i.

Siangkangan goarna si Esau, jala siampudan goarna si Jakkob. Lomo do roha ni si Esau marburu binatang. Alai molo si Jakkob lomo do rohana tinggal di jabu.

Di tingki i, molo dung mate bapakna, anak siangkangan do na mandapot tano dohot hepeng. On ma na didok warisan. Alai molo di keluarga ni si Isak, ndang holan arta na didok warisan. Janji na dilehon Jahowa tu si Abraham pe didok do warisan. Alai di roha ni si Esau, ndang porlu janji i. Molo di si Jakkob mansai porlu do i.

Di sada tingki, mulak ma si Esau tu jabu. Nunga loja ibana marburu. Dianggo ibana ma sipanganon na dilompa si Jakkob. Didok si Esau ma, ‘Nunga male hian ahu. Dia jo buburmi!’ Alai didok si Jakkob ma, ‘Hulehon pe! Alai marjanji ma jo ho, na lehononmu warisanmi tu ahu.’ Dialusi si Esau ma, ‘Ndang porlu di ahu warisan! Di ho pe taho i, dia ma jo buburmi nga male ahu.’ Menurutmu, na marbisuk do si Esau on? Daong. Ndang arga di si Esau warisan i holan alani samangkuk bubur.

 Nunga matua be si Isak jala dapot ma tingkina laho mamasu-masu anakna siangkangan. Alai, diurupi si Rebekka do si Jakkob anakna siampudan asa ibana na mandapot pasu-pasu. Dung diboto si Esau na masa i, muruk hian ibana jala naeng dibunu ma adekna i. Alai dijaga si Isak dohot si Rebekka do si Jakkob. Didok nasida ma tu si Jakkob, ‘Laho ma ho tu jabu ni tulangmu si Laban, disi ma ho tinggal sahat tu na so muruk be si Esau.’ Ditangihon si Jakkob do poda ni natua-tuana. Laho do ibana asa unang mate ibana.