Kɛ Izaaki ɲannin afuɛ ablanan’n (40), ɔ jali Rebeka. Ɔ klo Rebeka kpa. Kɛ ɔ́ kɔ́ i ɲrun’n, be wa wuli ba yasua nɲɔn. Be ti nda.

Be flɛ kpɛnngbɛn’n kɛ Ezau. Yɛ be flɛ i sinma’n kɛ Zakɔbu. Ezau klo wlanwlanlɛ, yɛ ɔ ti koniɛn difuɛ dan kpa. Sanngɛ Zakɔbu liɛ’n, ɔ fiteman.

Be blɛ su’n, sɛ siɛ kun wu’n, be fɛ i asiɛ’n nin i sika’n i dan lika be man ba kpɛn’n. Be flɛ ninnge sɔ mun kɛ aja like. Izaaki i awlo’n nun’n, aja like’n i wie yɛle like nga Zoova seli kɛ ɔ́ yó mán Abraamun’n. Aja like sɔ’n i ndɛ w’a loman Ezau. Sanngɛ Zakɔbu liɛ’n, ɔ buli i like cinnjin.

Cɛn kun’n, kɛ Ezau fín koniɛn bá’n, w’a fɛ kpa. Kɛ ɔ́ yó sɔ’n, nn Zakɔbu su tɔn aliɛ. Aliɛ sɔ’n bɔn fannin kpa. Yɛ Ezau seli i kɛ: ‘Awe kun min. Man min wɔ aliɛ ɲin ɔkwlɛ nga wie!’ Zakɔbu tɛli i su kɛ: ‘Sɛ a fa ɔ aja like’n man min’n, ń mán ɔ wie.’ Yɛ Ezau waan: ‘?Ń yó aja like’n i sɛ? A kwla fa. Aliɛ yɛ min waan ń dí-ɔ.’ ?Like nga Ezau yoli i lɛ’n ɔ ti kpa? Cɛcɛ. Ɔ timan kpa mlɔnmlɔn. Aja like’n ti cinnjin kpa, sanngɛ Ezau w’a bumɛn i like fi.

Siɛn mɔ Izaaki w’a yo oke’n, ɔ fata kɛ ɔ yrɛ i wa kpɛnngbɛn’n i su. Sanngɛ Rebeka yoli maan Zakɔbu m’ɔ ti kaan’n yɛ Izaaki yrɛli i su-ɔ. Kɛ Ezau wunnin i sɔ’n, ɔ fali ya  dan kpa. Yɛ ɔ kunndɛli kɛ ɔ́ kún i niaan’n. Izaaki nin Rebeka be kunndɛ kɛ bé sásá Zakɔbu. I sɔ’n ti’n, be seli i kɛ: ‘Kɔ ko tran ɔ nin i niaan bian Laban i wun lɔ. Sɛ Ezau i ya’n jɔ’n, a ko sa ɔ sin.’ Zakɔbu fali ndɛ nga i si nin i nin be kannin’n su, ɔ wanndili.