Isak beumur 40 taun lebuh iya jadi enggau Rebekah. Iya amat rinduka Rebekah. Nyau kelama, seduai bisi dua iku anak—anak lelaki besapit dua.

Anak ke tuai dikumbai Esau lalu ke biak dikumbai Jakop. Esau rindu bejalai ke tanah, lalu iya landik ngasu jelu. Tang Jakop rindu diau ba langkau kain.

Ba jeman nya, anak ke tuai diberi tanah sereta duit lebuh apai iya udah nadai. Tu dikumbai pesaka. Ba ruang bilik Isak, pesaka tu mega nyengkaum semaya ke digaga Jehovah enggau Abraham. Esau enda ibuhka pasal semaya nya, tang Jakop nemu nya amat berega.

Bisi sekali, Esau amat lelak pengudah ngasu sepemanjai hari. Iya ensium bau pemakai ti dipanduk Jakop lalu bejaku: ‘Lapar amat aku tu. Beri aku mimit bubur kachang mirah nya!’ Ku Jakop: ‘Aku endang deka meri ngagai nuan, tang nuan patut besumpah dulu meri pesaka nuan ngagai aku.’ Ku Esau nyaut: ‘Nama guna aku enggau pesaka nya? Ambi meh. Aku semina ka makai.’ Kati utai ke digaga Esau nya betul? Enda. Esau meri utai ti pemadu berega, ketegal ka makai semangkuk bubur.

Lebuh Isak nyau tuai, nya meh maya iya meri berekat ngagai anak ke tuai. Tang, Rebekah nulung Jakop, anak ke biak, ngulihka berekat nya. Lebuh Esau nemu pasal nya, iya amat ringat lalu berunding deka munuh sapit  iya. Isak enggau Rebekah deka ngelindung Jakop, nya kebuah seduai iya ngasuh Jakop: ‘Mupuk lalu diau enggau menyadi indai nuan, Laban, nyentukka Esau badu ringat.’ Jakop ningaka pesan apai indai iya lalu ngerarika diri.