LEKSION 12
Naala ni Jacob ti Tawid
Uppat a pulo ti tawen ni Isaac idi nagbalin nga asawana ni Rebecca. Inay-ayat unay ni Isaac ni Rebecca. Naaddaanda iti dua nga annak—singin a lallaki.
Esau ti nagan ti inauna ken Jacob met ti maikadua. Nalaing a mangnganup ni Esau ken kaykayatna ti agyan iti ruar. Kaykayat met ni Jacob ti agyan iti balay.
Ad-adu idi ti maited a daga ken kuarta iti inauna nga anak a lalaki no matay ti amana. Tawid ti awag iti dayta. Iti pamilia ni Isaac, karaman kadagiti maipatawid ti panagbalin a paset ti kari ni Jehova ken ni Abraham. Saan nga impateg ni Esau dagita a kari, ngem impateg dagita ni Jacob.
Maysa nga aldaw, simmangpet ni Esau a nabambannog iti agmalmalem a panaganupna. Naangotna ti naimas a makan a lutlutuen ni Jacob. Kinunana: ‘Mabisbisinak! Ikkannak iti lutlutuem!’ Insungbat ni Jacob: ‘Sige, ikkanka ngem ikarim pay nga itedmo kaniak ti tawidmo.’ Kinuna ni Esau: ‘Saan a napateg kaniak ti tawidko! Kukuamon. Basta makapanganak laeng.’ Husto ngata ti inaramid ni Esau? Saan. Insukat ni Esau ti maysa a nakapatpateg a banag iti sangamalukong a makan.
Idi lakayen ni Isaac, masapul a bendisionannan ti inauna nga anakna. Ngem tinulongan ni Rebecca ti inaudi a ni Jacob
tapno isu ti mabendisionan. Idi naammuan dayta ni Esau, kasta unay ti pungtotna ket implanona a patayen ti kasinginna. Kayat da Isaac ken Rebecca a protektaran ni Jacob, isu nga imbagada kenkuana: ‘Agyanka ken Laban a kabsat ni nanangmo agingga a maawan ti pungtot ni Esau.’ Nagtulnog ni Jacob ket pimmanaw tapno saan a matay.“Adda aya magunggona ti maysa a tao no matagikuana ti intero a lubong ngem mapukawna met ti biagna? Adda kadi a talaga ti maisukat ti maysa a tao iti biagna?”—Marcos 8:36, 37