Isak okwa li e na omido 40 eshi a hombola Rebekka, nokwa li e hole omukulukadi waye neenghono. Mokweendelako kwefimbo, ova ka dala ounona vavali oumati, eehamba.

Okamati koshiveli ove ka luka Esau, nondenge yako ove i luka Jakob. Esau okwa li e hole okukala mofuka nokwa li omukongo. Ashike Jakob okwa li e hole okukala peumbo.

Pefimbo olo, omonamati woshiveli okwa li ha pewa oshitukulwa sha kula shedu noimaliwa ngeenge xe okwa fi. Naasho osha li hashi ifanwa efyuululo. Moukwaneumbo waIsak, efyuululo ola li yo la kwatela mo okukala noshitukulwa momaudaneko oo Jehova a li a udanekela Abraham. Esau ka li e na ko nasha unene nomaudaneko oo, ashike Jakob okwa li e a lenga neenghono.

Efiku limwe, Esau okwa li e uya keumbo a loloka neenghono molwaashi okwa li a uhala koukongo. Okwa li e udite edimba liwa loikulya oyo Jakob a li ta teleke. Opo nee Esau okwa li a lombwela Jakob ta ti: “Pe nge ndi lye paife ei i tilyana, osheshi ame nda loloka.” Jakob okwa li e mu nyamukula a ti: ‘Ohandi shi ningi, ndele nandi lande po tete oushiveli woye.’ Esau okwa ti: ‘Akutu, ndi nokufya, noushiveli wange tau kwafa shike opo. Oto dulu oku u kufa po. Onda hala ashike okulya.’ Mbela oto diladila kutya Esau okwa li a ninga etokolo li li pandunge? Ahowe, kala li mondjila. Esau okwa li a yandja po oshinima shi na ondilo opo a pewe okayaxa komakunde.

 Eshi Isak a kulupa, okwa li a hala okunangeka noupuna omonamati waye oo a li omukulunhu kumukwao. Ashike Rebekka okwa li a kwafela Jakob ou a li munini kumukwao oye a mone omanangeko noupuna. Eshi Esau e shi uda, okwa li a handukila neenghono ondenge yaye, ndele ta diladila oku i di paa. Molwaashi Isak naRebekka ova li va hala okwaamena Jakob, ova li ve mu lombwela tava ti: ‘Inda u ka kale kuxokulu Laban, fiyo osheshi ehandu laEsau la lota.’ Jakob okwa li a pwilikina komayele ovadali vaye ndele tai onhapo a ka xupife omwenyo waye.