တၢ်မၤလိ ၁၂
စီၤယၤကိာ်ဒိးန့ၢ်ဘၣ်တၢ်န့ၢ်သါ
ဖဲစီၤအံၤစဲးအသးနံၣ်အိၣ်ဝဲအနံၣ် ၄၀ အခါ အဝဲဖျီအသးဒီး နီၢ်ရံးဘကၤလီၤ. စီၤအံၤစဲးအဲၣ်အမါဒိၣ်မးလီၤ. လၢခံန့ၣ် အဝဲသ့ၣ်ဒိးန့ၢ်ဘၣ်အဖိတဃံာ်ခံဂၤလီၤ.
အဖိခွါလၢအဒိၣ်တဂၤန့ၣ် အမံၤလၢစီၤဧ့ၡီၤ ဒီးအဖိခွါလၢအဆံးတဂၤန့ၣ် အမံၤလၢစီၤယၤကိာ်လီၤ. စီၤဧ့ၡီၤမ့ၢ်ပှၤခးအီၣ်တၢ်ဖိ ဒီးဟးခးအီၣ်တၢ်လၢ ပှၢ်ကျါမုာ်မးလီၤ. မ့မ့ၢ်စီၤယၤကိာ်န့ၣ် အိၣ်လၢဟံၣ်မုာ်ဝဲလီၤ.
လၢပျၢၤဖိဝဲၢ်ကိန့ၣ် ကဒိးန့ၢ်ဘၣ်ဝဲ တၢ်လီၢ်တၢ်ကျဲဒီး ကျိၣ်ဧိၤစ့ဧိၤအါန့ၢ်ဒံး အဒီပုၢ်ဝဲၢ်အဂၤတဖၣ်ဖဲ အပၢ်သံဝံၤအလီၢ်ခံန့ၣ်လီၤ. တၢ်သ့ၣ်တဖၣ်အံၤန့ၣ် ပကိးလၢတၢ်န့ၢ်သါလီၤ. ဘၣ်ဆၣ် လၢစီၤအံၤစဲးအဟံၣ်ဖိဃီဖိအကျါ ပှၤလၢအန့ၢ်ဘၣ်တၢ်န့ၢ်သါန့ၣ် ကန့ၢ်ဃုာ်ဒီးတၢ်ဆိၣ်ဂ့ၤလၢ ယဟိဝၤယွၤအၢၣ်လီၤအီလီၤဝဲဒီး စီၤအၤဘြၤဟၣ်န့ၣ်လီၤ. ဘၣ်ဃးဒီး တၢ်အၢၣ်လီၤအီလီၤတဖၣ်န့ၣ် စီၤဧ့ၡီၤတပာ်လုၢ်ပာ်ပှ့ၤဝဲဘၣ်. ဘၣ်ဆၣ် စီၤယၤကိာ်သ့ၣ်ညါဝဲလၢ တၢ်အၢၣ်လီၤအီလီၤတဖၣ်န့ၣ် မ့ၢ်တၢ်လၢအလုၢ်ဒိၣ်ပှ့ၤဒိၣ်လီၤ.
ဘၣ်တနံၤန့ၣ် စီၤဧ့ၡီၤလဲၤခးအီၣ်တၢ်လၢ ပှၢ်ပူၤဒီးဖဲအဝဲဟဲက့ၤလၢဟံၣ်အခါ လီၤဘှံးဝဲဒိၣ်မးလီၤ. ဖဲန့ၣ်အဆၢကတီၢ် ဘၣ်လၢစီၤယၤကိာ်ဖီအီၣ်တၢ် ဒီးကသူနၢမူထီၣ်ဝဲအဃိ စီၤဧ့ၡီၤအဲၣ်ဒိးအီၣ်ဝဲလီၤ. စီၤဧ့ၡီၤတဲဘၣ်အပုၢ်လၢ– ‘ယဟၢဖၢလီၤဘဲဒိၣ်မး, ဒုးအီၣ်ယၤကသူမီၤ.’ စီၤယၤကိာ်တဲဆၢက့ၤ အဝဲၢ်ခွါလၢ– ‘ယကဒုးအီၣ်နၤ, ဘၣ်ဆၣ် အဆိကတၢၢ်န့ၣ် နကဘၣ်အၢၣ်လီၤယၤလၢ နကဟ့ၣ်လီၤယၤလၢ နတၢ်န့ၢ်သါလီၤ.’ စီၤဧ့ၡီၤတဲက့ၤအပုၢ်လၢ– ‘ယတလီကီတၢ်န့ၢ်သါဘၣ်. ဟံးန့ၢ်ခီ. ယအဲၣ်ဒိးအီၣ်တၢ်လံ.’ စီၤဧ့ၡီၤတပာ်လုၢ်ပာ်ပှ့ၤ အတၢ်န့ၢ်သါအဃိ မ့ၢ်အဝဲအိၣ်ဒီးတၢ်ကူၣ်သ့ဧါ. အဝဲတအိၣ်ဒီးတၢ်ကူၣ်သ့ဘၣ်. စီၤဧ့ၡီၤခီလဲကွံာ်ဝဲ အတၢ်န့ၢ်သါလၢအလုၢ်ဒိၣ်ပှ့ၤဒိၣ် ဒီးကသူထဲတခွးလီၤ.
ဖဲစီၤအံၤစဲးသးပှၢ်ထီၣ်အခါ တၢ်ဆၢကတီၢ်ဘၣ်လၢ ကဘၣ်ဆိၣ်ဂ့ၤအဖိခွါဝဲၢ်ကိလီၤ. ဘၣ်ဆၣ် နီၢ်ရံးဘကၤမၤစၢၤအဖိခွါစီၤယၤကိာ်လၢ ကဒိးန့ၢ်ဘၣ်တၢ်ဆိၣ်ဂ့ၤအဂီၢ်လီၤ. ဖဲစီၤဧ့ၡီၤသ့ၣ်ညါဘၣ်တၢ်ဂ့ၢ်အံၤအခါ အသးပှံၢ်ထီၣ်တၢ်ဒိၣ်မး ဒီးကူၣ်ထီၣ်ဝဲလၢ ကမၤသံအပုၢ်လီၤ. စီၤအံၤစဲးဒီးနီၢ်ရံးဘကၤ အဲၣ်ဒိးဒီသဒၢဝဲစီၤယၤကိာ်အဃိ အဝဲသ့ၣ်တဲဘၣ်အဖိခွါလၢ– ‘လဲၤအိၣ်ဒီးနမိၢ်အဝဲၢ်ခွါစီၤလၤဘၣ် တုၤလၢစီၤဧ့ၡီၤအတၢ်သးဒိၣ်ခုၣ်လီၤတက့ၢ်.’ စီၤယၤကိာ်ဒိကနၣ်အမိၢ်အပၢ်အကလုၢ်ဒီး ဃ့ၢ်ပူၤဖျဲးအသးလီၤ.
“ပှၤကညီ မ့ၢ်န့ၢ်ဘၣ်ဟီၣ်ခိၣ်ဒီဘ့ၣ်ညါ, ဒီးမၤဟါမၢ်ကွံာ် အသးဒီး, မ့ၢ်အန့ၢ်ဘျုးမနုၤလဲၣ်. မ့တမ့ၢ်ဘၣ်ဒီး, ပှၤကညီကဟ့ၣ်အပှ့ၤလၢ အသးအဂီၢ်လၢ မနုၤတမံၤလဲၣ်.”—မၢ်ကူး ၈:၃၆, ၃၇
