Isaka naanani lilimo ze 40 ka nako yanyala Rebeka. Naamulatile hahulu. Hamulaho wa nako, baba ni bana bababeli, ili mambile babashimani.

Libizo la yomuhulu neli Isau, mi wa mwanana neli Jakobo. Isau naalata hahulu kuzamaya, mi naali muzumi yomutuna wa lifolofolo. Kono Jakobo naalata kuba fa ndu.

Mwa linako zeo, mwana yomuhulu naafiwanga mubu ni masheleñi bo ndatahe habashwa. Lika zanaafiwanga zeo nelibizwa saanda. Mwa lubasi lwa Isaka, saanda nesikopanyeleza kuba ni kabelo mwa lisepiso za Jehova ku Abrahama. Isau naasika isa hahulu pilu kwa lisepiso zeo, kono Jakobo naaziba kuli neli za butokwa.

Zazi leliñwi, Isau akuta kwa ndu inze akatezi hahulu hamulaho wa kuzuma. Autwa muunko omunde wa lico zanaaapeha Jakobo mi ali: ‘Nishwile hahulu tala! Nakupa unife kwa lico zefubelu ze!’ Jakobo amualaba, ali: ‘Nika kufa, kono pili unilekise tukelo yahao ya bueli.’ Isau ali: ‘Hanina taba ni tukelo ya bueli! Nikufile yona. Nibata feela kuca.’ Kana munahana kuli katulo yanaaezize Isau neli yende? Nesi katulo yende. Isau naafanisize nto ya butokwa hahulu, ka kubata feela lico.

Isaka hasaa supezi hahulu, naatokwa kufuyaula mwanaa hae yomuhulu ka kufitisisa. Kono Rebeka naatusize Jakobo,  mwanaa hae wa mwanana kufiwa mbuyoti. Isau hanaazibile taba yeo, naanyemile hahulu, kuli mane anahana za kubulaya munyanaa hae Jakobo. Isaka ni Rebeka nebabata kusileleza Jakobo, kacwalo, bamubulelela kuli: ‘Nanuha mi umatele ku malumaho, Labani, uyo ina ni yena ka nakonyana kufitela, kufitela buhali bwa muhulwanaa hao bukuyuka.’ Jakobo naalatelezi kelezo yene bamufile bashemi bahae mi abaleha kuli apilise bupilo bwahae.