Kar 40 an Aisak iiõ ke ear m̦areik Rebeka. Ear lukkuun yokwe kõrã in pãleen. Tokãlik, ekar wõr ruo nejierro po l̦addik.

Etan l̦adik eo erũtto in Iso, im etan l̦adik eo edik in Jekob. Ekar em̦m̦an itoitak im pãd ijoko nabõj ippãn Iso, im ear jel̦ã kilen kappok menninmour ñan aer m̦õñã. Ak Jekob ear oktak. Ear em̦m̦an ippãn pãdwõt ilo m̦weo im̦õn.

Ilo kar iien ko etto, ñe ej mej jemãn juon baam̦le, rej lil̦o̦k enañin aolepen wãto ko im jããn ko an ñan rũttotata eo nejin. Rej n̦aetan men in, menin jolõt. Ilo kar baam̦le eo an Aisak, jeraam̦m̦an eo ñan jipañ kajejjet kallim̦ur ko an Jeova ñan Ebream rar bar m̦õttan menin jolõt ko kar lil̦o̦k ñan rũttotata eo. Iso ear jab kaorõk kallim̦ur kein an Jeova, ak Jekob ear jel̦ã bwe kallim̦ur kein relukkuun aorõk.

Juon raan, Iso ear ro̦o̦l ñan m̦weo im̦õn ãlikin an kar kappok menninmour ñan aer m̦õñã im ear lukkuun m̦õk. Ear ãtbwiin enno̦ in m̦õñã eo Jekob ear kõmatte im ear ba: ‘Ilukkuun kwõle! Letok kijõ juub n̦e ebũrõrõ kwaar kõmatte!’ Jekob ear ba: ‘Inaaj lewaj, ak kwõj aikuj kallim̦ur m̦okta bwe kwõnaaj letok menin jolõt eo am̦.’ Iso ear uwaak im ba: ‘Ejjel̦o̦k tokjãn menin jolõt en̦! Kwõmaroñ bõke. Ak kwõn letok kijõ bwe in m̦õñã.’ Men  in Iso ear kõm̦m̦ane ear kaalikkar an jab lukkuun mãlõtlõt. Ear aje juon men elukkuun aorõk bwe en ebbõk kijen juub.

Ke Aisak ear lukkuun rũtto, ear jejjet iien eo ñan an kajeraam̦m̦ane rũttotata eo nejin. Ak Rebeka ear jipañe Jekob, l̦eo edikl̦o̦k, bwe en e eo en bõk menin jolõt eo. Tokãlik ke Iso ear jel̦ã kõn men in, ear lukkuun illu im ear pojak in m̦an po eo jatin. Aisak im Rebeka rar kõn̦aan kõjparoke Jekob, im rar ba ñane: ‘Etal im pãd ippãn Leban, l̦eo erũtto jãn jinõm̦, m̦ae iien ejako an Iso illu.’ Jekob ear roñjake jinen im jemãn im ear ko bwe en kõjparok mour eo an.