40 ku̱i̱ya̱ ta̱ Isaac tá ti̱ndaʼa̱ra xíʼin ñá Rebeca. Ta̱yóʼo xi̱kuni̱nírañá. Ni̱ya̱ʼa tiempo ta ka̱ku u̱vi̱ se̱ʼena ta̱ kúáti.

Ta̱ chée xi̱naní Esaú, ta ta̱ loʼo xi̱naní Jacob. Ta̱ Esaú xi̱kutóora ku̱ʼu̱nra yuku̱ ta va̱ʼaní xi̱xaʼníra kití. Soo ta̱ Jacob xi̱kutóora koora veʼe.

Tá tiempo saá, tá iin ta̱a ni̱xi̱ʼi̱ra, se̱ʼe nu̱úra kúú ta̱ ku̱a̱ʼáka ñuʼú xíʼin xu̱ʼún xi̱ndakiʼin. Ña̱yóʼo herencia káʼa̱nna xíʼinña. Ña̱ ki̱ndoo Jehová xíʼin ta̱ Abrahán taxira ndaʼa̱ra ña̱yóʼo xi̱kuu herencia ña̱ ndakiʼin ta̱ Isaac. Va̱ása níxi̱ndayáʼaví ña̱yóʼo nu̱ú ta̱ Esaú. Soo nu̱ú ta̱ Jacob ndáyáʼviníña.

Iin ki̱vi̱ ta̱ Esaú ku̱naaníra ndi̱kóra veʼera chi ni̱xa̱ʼa̱nra yuku̱ ña̱ kaʼníra kití. Tasaá ya̱sinní xáʼa̱n ña̱ ke̱ʼé ta̱ Jacob ta ni̱ka̱ʼa̱n ta̱ Esaú xíʼinra: “Kúni̱níi̱ kuxuíi̱. Taxi loʼo ña̱ kúáʼa ña̱ kéʼún ná kuxuíi̱”. Ta̱ Jacob ni̱ka̱ʼa̱nra: “Va̱ʼava, soo siʼnaka chika̱a̱ iin trato xíʼi̱n ña̱ yi̱ʼi̱ ndakiʼi̱n herencia nu̱ún”. Ta̱ Esaú nda̱kuiinra: “Kǒo ndáyáʼvi herencia nu̱úi̱. Ndakiʼinña tá kúni̱ún chi ta̱ kúni̱ kuxuva kúi̱”. ¿Á va̱ʼa ña̱ ke̱ʼé ta̱ Esaú túviún? Va̱ása. Saáchi na̱samara iin ña̱ ndáyáʼviní xa̱ʼa iin koʼo̱ loʼo ña̱ kuxura.

Tá xa̱a̱ ku̱chée ta̱ Isaac, ki̱xa̱a̱ ki̱vi̱ ña̱ taxira bendición ndaʼa̱ se̱ʼera ta̱ nu̱ú. Soo ñá Rebeca chi̱ndeéñá ta̱ Jacob, ta̱ loʼoka nu̱ú ta̱ Esaú, ña̱ ndakiʼinra bendición. Tá na̱kunda̱a̱-ini ta̱ Esaú xa̱ʼa  ña̱yóʼo, ni̱sa̱a̱níra ta ki̱xaʼá ndákanixi̱níra ndáa ki̱ʼva kaʼníra ta̱ Jacob. Ta̱ Isaac xíʼin ñá Rebeca va̱ása kúni̱na ña̱ ndoʼora ña̱yóʼo ña̱kán ni̱ka̱ʼa̱nna xíʼinra: “Kúaʼan nu̱ú íyo xitoún ta̱ Labán, ku̱ʼva siʼún, nda̱a̱ ná nandosó-ini ta̱ Esaú xa̱ʼa ña̱yóʼo”. Ta̱ Jacob ka̱ndíxara ña̱ ni̱ka̱ʼa̱nna xíʼinra ta ke̱era ku̱a̱ʼa̱nra ña̱ va̱ʼa ná kǒo kuvira.