Isaac kipixtoya 40 xiuitl kema mosiuajtik iuaya Rebeca, uan tlauel kiikneliyaya. Teipa kinpixkej omej ininkoneuaj, eliyayaj kuatemej.

Katli achtoui tlakatki motokaxtiyaya Esaú, uan iikni motokaxtiyaya Jacob. Esaú kipaktiyaya yas tlapeuati, uan kuali tlapeuayaya, uan Jacob kipaktiyaya mokauas ichaj.

Ipan nopa tonali, san katli achtouiejketl kiseliyaya miak tlali uan tomij kema itata mikiyaya. Tlen kinmakayayaj eliyaya se herencia. Nopa herencia tlen Isaac ichampoyouaj kipixtoyaj nojkia eliyaya tlen Jehová kitenkauilijtoya Abraham. Esaú amo kipatiitayaya tlen Jehová kintenkauilijtoya ichampoyouaj, uan Jacob kena.

Se tonali, Esaú tlakuepilik ichaj tlauel siajtok pampa se tonal tlapejtoya. Uajka, kiijnejki nopa tlakualistli tlen kichijchijtoya Jacob, uan kiiljuik: “Tlauel nimayana. Xinechmaka se kentsi tlen nopa tlakualistli chichiltik”. Uajka Jacob kiiljuik: “Achtoui xikijto na nijselis nopa herencia tlen ta kinamiki tijselis”. Uan Esaú kinankilik: “¡Amo tleno ipati nopa herencia! Tlaj tijneki, ta xijseli. Namantsi nijneki nitlakuas”. ¿Timoiljuia kuali tlen kichijki Esaú? Amo. Esaú amo kinejki kiselis se tlamantli tlen tlauel ipati san pampa kinekiyaya tlakuas.

 Kema Isaac ueuejtixtoya, moiljuik kinamikiyaya kiteochiuas ikone achtouiejketl. Rebeca kipaleuik Jacob ma kiseli nopa tlateochiualistli, yeka Isaac kiteochijki Jacob maske amo eliyaya achtouiejketl. Kema Esaú kimatki, tlauel kualanki uan kinejki kimiktis iikni. Isaac uan Rebeca amo kinekiyayaj ma kimiktikaj, yeka kiiljuijkej: “Xia kampa itstok motío Labán. Nopaya ximokaua uan xijchia Esaú ma moyoltlali”. Jacob kichijki tlen itatauaj kiiljuijkej, kiampa iikni amo kimiktiskia.