Isaac kipiaya 40 xiujmej keman monamiktij iuan Rebeca. Yejua semi kitasojtaya. Satepan kinpiakej ome okichpipil akin senyolkej.

Akin tayekanaya monotsaya Esaú, uan xokoyot, Jacob. Esaú semi kiuelitaya yetos koujtaj, uan katka se kuali tatokakej. Sayoj ke Jacob okachi kiuelitaya yetos kalijtik.

Itech nejon tonalmej, akin tayekanaya kiseliaya okachi talmej uan tomin ke iikniuan keman ipopaj momikiliaya. Nejon katka se netetayokolil. Iniuan ichankauan Isaac, akin kiseliskia nejon netetayokolil no kijtosnekia ke itechkopa mochiuaskia tein Jiova motenkaujka iuan Abrahán. Esaú amo kipatiuitaya nejon netenkaualismej. Sayoj ke Jacob kimatia ke motelnekiaj.

Se tonal, Esaú tel sioujtoya keman ajsik ichan satepan ke nochi tonal tatokato. Ompa, kijnekuik takual tein uelik tein Jacob kichijchiujtoya, uan kijtoj: “¡Nimayanmiki! ¡Xinechmaka tepitsin nejon takual chichiltik!”. Jacob kiluij: “Kemaj, sayoj ke achto ximotenkaua nouan ke uelis nimokauilis monetetayokolil”. Esaú kinankilij: “¡Amo nikneki nejon netetayokolil! Ximokauili. Nejua nikneki nitakuas”. ¿Tiknemilia ke Esaú kinextij tamatilis keman kichiuak nejon? Amo. Yejua kiixtopeuak se taman tein kitelpiaya ipatiuj sayoj ika sentapalkat takual.

 Keman Isaac xiuejya katka, ejkok tonal keman monekiaya kitiochiuas itelpoch akin tayekanaya. Sayoj ke Rebeca kipaleuij Jacob, akin xokoyot, maj yejua kitiochiuani. Esaú kimatik nejon, tel kualanik uan kiixtalij kimiktis iikniuj. Isaac uan Rebeca amo kinekiaj maj teisa kipano Jacob, yejua ika kiluijkej: “Xiyouj uan ximokaua iuan motío Labán, iikniuj momomaj, hasta maj Esaú moyolseui”. Jacob kintajtolkakik itatuan uan choloj.