Isaac kipiaya 40 xiuitl ijkuak ononamikti iuan Rebeca. Isaac melak kitlasojtlaya. Sakin, okipixkej ome inkoneuan kouatsitsintin.

Akin yakatstiuj okitokayotijkej Esaú niman akin ompa kontokaya, Jacob. Esaú melak kuelitaya kistinemis ipan tepetl niman ueliya kinmajsiya yolkamej. San ika, Jacob kuelitaya nemis ichan.

Ipan yejon tonaltin, tekoneuj akin yakatstiaya kiseliaya tlaltin niman tomin xijkon ken ikniuan ijkuak mikiya intaj. Yejon katka se herencia. Itech ichanejkauan Isaac, yejuin herencia, noijki kijtosnekiya ika kiseliskiaj tlen Jehová okijlika Abrahán kimakaskia. Esaú xkitlasojkaitaya tlen yonoijtoka nochiuaskia, san ika, Jacob kimatstoya ika melak ueyi kijtosnekiya.

Se tonajli, Esaú oajsik ichan niman melak siaujtoya ika osetonalo okiyejyeko kinmajsis yolkamej. Yejua okijneuk uelik tlakuajli tlen Jacob kichijchiujtoya niman okijli: “¡Melak napismiki! ¡Xnechmaka achijtsin tlen otikchijchiuj, yejon tlen chichiliujtok!”. Jacob okijli: “Maski, san ika, kachtopa xnechijli ika uelis nikpiyas moherencia”. Esaú okinankili: “¡Xnechajmana noherencia! ¡Uelis timokauilis! Nejua san nikneki nitlakuas”. ¿Tiknemilia ika Esaú tlamachilise ijkuak ijkon okichiuj? Ka, Esaú otetlayokoli tlen melak tlasojtiya san ipampa se tlakuajli.

 Ijkuak Isaac iueuentsin katka, oajsik tonajli ijkuak nonekiya kiteochiuas ikoneuj akin yakatstiuj. San ika, Rebeca okipaleui Jacob, ikoneuj akin pitentsin, makiseli tlateochiualistli. Ijkuak Esaú okimat, melak okualan niman okijto kimiktis. Isaac iuan Rebeca kinekiyaj kitlajpiyaskej Jacob, kuakon okijlikej: “Xuiya niman xmokaua kampa Labán, ikniuj monan, hasta ijkuak manoyolseui Esaú”. Jacob okinkak itajuan niman ocholoj, ijkon onomakixti.