Áízak 40 binááhaigo, Rebékah hweʼasdzą́ą́ ájiilaa. Éí ayóóʼáyóʼníigo ashiiké naakiígíí haʼáłchíní hazlı̨́ı̨́ʼ.

Ashkii alą́ąjįʼígíí éí Íísa woosyeʼ, akééʼdóóígíí éí Jéíkab. Íísa ayóó átʼéego naalzheehii jizlı̨́ı̨́ʼ. Jéíkab éí hooghangi tʼéiyá hoł yáʼáhootʼééh.

Íídą́ą́ʼ éí ayeʼ alą́ąjįʼígíí bizhéʼé ádin yileehgo, bikéyah dóó bibéeso yę́ę bííʼ yileeh. Éí bííʼ dadooleełii wolyé. Áízak bitsʼą́ą́dóó oochíłígíí Jiihóvah yee ádee haadzííʼ yę́ę ałdóʼ bííʼ dadooleeł. Díí éí Íísa doo bił nilı̨́į da, ndi Jéíkab éí ayóó bił nilı̨́.

Íísa éí naalzheehdę́ę́ʼ yéigo chʼééh deeyáago nádzá. Jéíkab atooʼ ayóó łikango yiłbéezhgo yiłchíngo ání: ‘Dichin shiʼniiłhı̨́! Atooʼ łichíʼígíí łaʼ shaa níkaah!’ Jéíkab ádííniid: ‘Alą́ąjįʼ yizhchíinii bííʼ dooleełii shaa diníʼaah, áko índa atooʼ naa deeshkááł.’ Íísa ánáádíʼní: ‘Éí yáadi shı̨́ı̨́ átʼé! Éí nííʼ dooleeł. Adeeshı̨́ı̨́łjí tʼéí baa nitséskees.’ Íísa ádzaaígíísh doo áhályą́ą da? Aooʼ. Éí alą́ąjįʼ yizhchíinii bííʼ dooleełii yę́ę tʼááłáhídi oodą́ʼígíí bee yóóʼazhdííʼą́.

Áízak są́ silı̨́įʼgo, hayeʼ alą́ąjįʼígíí bee bikʼi hozhdoodliiłígíí baa hoolzhiizh. Rebékah éí Jéíkab bíká ajoolwodgo bíjígo bikʼi hojisdliʼ. Íísa bił bééhózingo yikʼee báhóóchįįd, áádóó hatsilí jidiyoołhéełgo bohozdeezʼą́. Áízak dóó Rebékah éí Jéíkab doo  bidiʼyoolyéeł da jinízingo ábijiní: ^‘Shiyáázh, shínaaí Léíban bichʼįʼ dínááh; nínaaí bá náhoojǫǫdjįʼ.’ Jéíkab éí bimá dóó bizhéʼé yikʼeh hóółʼįįdgo, tsı̨́įłgo dah diilwod.