Isaac kʼo 40 ujunabʼ are chiʼ xkʼuliʼ rukʼ Rebeca. Areʼ sibʼalaj kraj ri rixoqil. Qʼaxinaq jun tiempo xeʼalax kalkʼwal che e yoʼx, e kebʼ alabʼom.

Ri nabʼeʼal ubʼiʼ Esaú ri uchaqʼ, Jacob. Esaú utz krilo kbʼe pa juyubʼ, xuqujeʼ are jun utzalaj chapal chikop. Are kʼu Jacob utz krilo kkʼojiʼ cho jaʼ.

Pa taq ri qʼij riʼ, ri nabʼeʼal kyaʼ rulew xuqujeʼ urajil chkiwach ri e rachalal are chiʼ kkam ri kitat. Wariʼ kbʼix echabʼal che. Pa ri ufamilia Isaac, ri echabʼal xuqujeʼ kʼo ubʼanik rukʼ ri utzujum Jehová che Abrahán. Esaú nim ta kril wi wajun tzujunik riʼ. Are kʼu Jacob retaʼm che nim ubʼanik.

Jun qʼij, Esaú xopan cho rachoch sibʼalaj kosinaq rumal che ronojel ri qʼij xbʼe che kichapik chikop. Tekʼuriʼ, xunaʼ ri ruxlabʼ ri rikil tajin kubʼan Jacob, xubʼij che: «¡Kinkam che numik! ¡Chayaʼ jubʼiqʼ we ri rikil!». Jacob xubʼij che: «Kinyaʼo, are kʼu nabʼe chabʼij chwe che kaya kan ri awechabʼal chwe». Esaú xubʼij: «¡Kʼo ta we che wajun echabʼal riʼ! Chkʼol kan awukʼ. Ri kwaj in are kinwaʼik». ¿La kabʼij at che Esaú kʼo unoʼj are chiʼ xubʼan waʼ? Kʼo taj, jeʼ ta riʼ. Xretzelaj jun jastaq che nim ubʼanik xa rumal jun laq rikil.

Are chiʼ Isaac xrijobʼik, xopan ri qʼij rech kutewchij ri nabʼeʼal ukʼojol. Are kʼu Rebeca  xutoʼ Jacob, ri ral che chaqʼixel, rech ri utat kutewchij areʼ. Are chiʼ Esaú xretaʼmaj, xpe nimalaj royowal xuchomaj kukamisaj ri rachalal. Isaac xuqujeʼ Rebeca kkaj kkichajij Jacob, rumal laʼ xkibʼij che: «Jat rech katkʼojiʼ kukʼ ri atío Labán, ri uxibʼal ri anan, kʼa kqʼax na ri royowal Esaú». Jacob xubʼan ri xkibʼij ri unan utat che xanimaj bʼik rech kkamisax ta rumal ri rachalal.