Isacca 40 huatacunata charishpami Rebecahuan cazararca. Paitaca achcatami cꞌuyarca. Qꞌuipaca ishqui churicunatami charircacuna.

Punta churica Esaú shutimi carca. Qꞌuipa churica Jacob shutimi carca. Esauca urcucunapi purinata munaj, sacha animalcunata huañuchinata alli yachajmi carca. Jacobca huasipi canatami munarca.

Chai tiempopica punta churimi yaya huañujpica familiapi tiyaj cullquitapish allpacunatapish qꞌuipa huahuacunata yalli japina carca. Chaitami herencia nijcuna carca. Isaacpaj familiapica Jehová Dios Abrahamman cusha nishcacunapishmi shuj herencia carca. Esauca Dios cusha nishcacunataca yangapimi churarca. Pero Jacobca achcatami valichij carca.

Shuj punllaca Esauca urcucunapi cainashca qꞌuipami huasiman shaicushca tigrarca. Huasiman chayajpimi Jacob yanucushca micunaca mishquiman ashnacurca. Chaimi Esauca Jacobtaca, ‘yaricaihuan huañucunimari. Can yanucun micuita carahuai’ nirca. Chaimi Jacobca, ‘can punta churi cashcata cunan punllataj ñucaman cꞌatupai’ nirca. Esauca, ‘punta churi cashcaca ñucapajca ima mana canchu, chai herenciahuan saquirilla’ nircami. Chaita rurashpaca ¿Esauca yachaj cashcatachu ricuchirca? Mana. Shuj plato micunallamantami punta churi japina herenciata yangapi churarca.

 Isaac yuyaj cajpimi punta churiman bendicionta cuna punlla chayarca. Rebeca huarmica paipaj qꞌuipa churi Jacobta Isaac bendiciachunmi ayudarca. Chaita Esaú yachashpaca achcata pꞌiñarishpami paipaj huauquita huañuchinata yuyacurca. Isaacpish Rebecapish cuidashun nishpami Jacobtaca, ‘ñuca tío Labanpajman ri. Cambaj huauqui canta pꞌiñacushcata cungaringacama paihuan causagri’ nircacuna. Paicunata cazushpami Jacobca paipaj huauqui ama huañuchichun miticushpa rirca.