Abrahanpa churin Isaacmi 40 watanpi Rebecawan casarakurqa. Paykunaqa anchatam kuyanakurqaku, chaymantapas Rebecaqa mellizotam wachakururqa.

Piwi kaqpa sutinmi karqa Esau, sullkapañataqmi karqa Jacob. Esauqa kaypi-chaypi purispanmi animalkunata hapimuq, Jacobñataqmi wasipi yanapakuq.

Chay tiempopiqa piwi kaqmi taytan wañukuptin achka chakrayuq hinaspa achka qullqiyuq qipaq. Chaymantapas piwi kaqwanmi Jehova Diosqa Abrahanman nisqanta ruwanan karqa, tukuy chaytam niqku “herencia” nispa. Chayna kaptinpas Esauqa piwi kasqantam mana kaqpaq hapirqa. Jacobmi ichaqa piwi kaytaqa allinpaq hapirqa.

Huk kutipim Esauqa tukuy punchaw animal hapimusqanmanta llumpay pisipasqa yarqaymanta kutiramurqa, hinaspam Jacobpa miskillaña yanukusqanta musyaruspan nirqa: “¡Wañuruchkaniñam yarqaymanta! ¡Puka mikuynikita qaraykamuway!”, nispa. Jacobñataqmi nirqa: “Puntataraq piwi kaynikita quykuway”, nispan. Esaumi nirqa: “¿Imapaqtaq valen piwi kasqayqa? Munaptikiqa qampaqyá kachun”, nispa. Chaynata nispanmi Esauqa piwi kasqanta wischupakurqa.

 Isaacqa machuyaruspanmi piwi churin Esauta bendecinan karqa, Rebecam ichaqa Jacobta yanaparqa bendecisqa kananpaq. Chayta yacharuspanmi Esauqa llumpayta piñakuruspan wawqinta wañuchiyta munarqa, chaymi Isaacwan Rebecaqa Jacobta nirqaku: “Ayqikuy Haran IIaqtapi tioyki Labanpa wasinman. Chaypiyá kamuy wawqikipa piñakuynin pasanankama”, nispa. Jacobñataqmi tayta-mamanta kasukuspan ayqikurqa.