Ked o Isak hine lje 40 berš, ženindža pe e Rebekaja. Ov but manglja la. Palo disavo vreme, dobindže duje muršen hem on hine bliznakija.

Prvo bijandilo o Isav, a palo odova o Jakov. O Isav but manglja te ovel avri hem hine šukar lovco. Ama, o Jakov pobuter manglja te ovel čhere.

Ko odova vreme, palo e dadeso meribe, o najphureder čhavo dobini najbaro deo andi phuv hem ando pare. Odova vičindža pe nasledstvo. Ki e Isakesi porodica, deo ando nasledstvo hine hem o obećanje so o Jehova dindža e Avrahamese. E Isavese na hine but važna akala obećanja, ama e Jakovese hine but važna.

Jekh dive, o Isav alo čhere but umorno sose hine celo dive ko lov. Ked dikhlja so o Jakov čerdža diso šukar hajbase phendža ljese: „But hijum bokhalo, de man te hav hari ando odova lolo habe.“ O Jakov phendža ljese: „Ka dav tut, ama prvo obećin maje so ka de man to nasledstvo.“ O Isav phendža: „Baš maje briga aso nasledstvo! Ka dav tut lje, samo de man te hav.“ So mislineja, da li odova so čerdža o Isav hine šukar? Na, na hine. O Isav našaldža diso but vredno, sebepi jekh obično habe.

 Ked o Isak hine but phuro, valjandža te blagoslovini e prvone čhave. Ama, i Rebeka pomožindža e Jakovese, ov te dobini o blagoslov. Ked o Isav šundža odova, but holjandža hem manglja te mudari pe phralje. Te šaj te zaštitinen e Jakove, o Isak hem i Rebeka phendže ljese: „Dža ko to ujko, ko Lavan, hem ačhov uduri sa dži na smirini pe o Isav.“ O Jakov šundža pe roditeljengo savet hem našlja te šaj te spasini pe.