Yisihaaqi 40 diro ikkisita Ribiqa yinanni beetto adhino. Isi Ribiqa lowo geeshsha baxanno. Gedensaanni Yisihaaqinna Ribiqa labballo lakkuwa ilino.

Bayiriidihu suˈmi Eesawuuti; maaˈniidihu suˈmi Yaiqoobiiti. Eesawu gobba hosa baxanno; isi worba ugaaxaanchooti. Yaiqoobi kayinni mine hosa baxanno.

Hatte yannara, annu reyanno woyite bayiriidi beetti rooriidi baattonna woxe adhanno. Tenne raggete yinanni. Yisihaaqi ooso, Yihowa Abirihaamira uyino hexxono ragidhanno. Eesawu, Maganu Abirihaamira coyiˈrino qaale mulluri gede asse kiirino; Yaiqoobi kayinni Yihowa coyiˈrino qaali lowore ikkinota afino.

Mitto barra Eesawu ugaaxanni hose daafurinohu minira dayi. Isi Yaiqoobi ganino woxi fooli eˈˈeennasi togo yii: “Hude shituena rakke tenne duume woxi uyie.” Hakkiinni Yaiqoobi, ‘Balaxxe raggekki uyiexa’ yiisi. Eesawu qole, ‘Ragge ma assiˈreemmo? Adhite anera sagalella uyie’ yii. Eesawu hatto yaasi garahoni? Digaraho. Eesawu mitte hige itanno sagalera yee lowo geeshsha dancha ikkino coye huˈnino.

Yisihaaqi geedhino daafira bayiriidi beettosi maassiˈranno yanna iillitu. Ribiqa kayinni maasso maaˈniidi beetti Yaiqoobi  adhanno gede assitino. Eesawu tenne afiti lowo geeshsha hanqi; hakkiinni lakkicha rodoosi Yaiqoobi shaara hedi. Yisihaaqinna Ribiqa Yaiqoobi gatisa hasiˈrino daafira togo yitusi: ‘Rakke abbikki Laabawa haˈri; rodiikki hanqi qiida geeshsha isiwa heeˈri.’ Yaiqoobi annisinna amasi amaale macciishshe abbisiwa xooqino.