Na faaipoipo Isaako iā Repeka ina ua 40 ona tausaga. Na alofa tele o ia iā Repeka. Mulimuli ane, na maua se la fanau e toʻalua, o le masaga tama.

O le tama matua o Esau, a o le tama laʻitiiti o Iakopo. Sa fiafia Esau e alu i le fanua, ma sa lelei o ia i le tuli manu. Ae o Iakopo sa fiafia o ia e nofo i le fale.

I na aso, o le tama matua e na te mauaina le tele o le vaega o fanua ma tupe a lona tamā pe a oti. O le mea lenā e taʻu o le tofi. I le aiga o Isaako, na aofia ai foʻi i le tofi folafolaga na fai atu e Ieova iā Aperaamo. E leʻi popole tele Esau i na folafolaga, ae na iloa e Iakopo e tāua tele na folafolaga.

I se tasi aso, na sau Esau i le fale ua matuā lēlavā lava ona ua alu le aso o tuli manu. Na sasala atu le manogi manaia o le meaʻai a Iakopo sa fai. O lea na fai atu ai Esau iā Iakopo: ʻUa ou fia ʻai. Aumai sina sitiū mūmū lenā seʻi oʻu ʻai ai.’ Na tali mai Iakopo: ʻE avatu sau sitiū mūmū, pe afai e te tautō muamua mai e aumai ma aʻu lou tofi.’ Na fai atu Esau: ʻOu te lē popole i loʻu tofi, avatu ma oe. Pau le mea ia aumai saʻu meaʻai, ua ou fia ʻai.’ Po o se gaoioiga poto na faia e Esau? E leai. Na lafoaʻi e Esau se mea e sili ona tāua, ina ia maua ai se ipu meaʻai o le sitiū mūmū.

Ua toeaina lava Isaako, ma ua oo nei i le taimi e faamanuia atu ai i lona atalii  ulumatua. Ae na fesoasoani Repeka iā Iakopo le uii, ina ia maua lenā faamanuiaga. Ina ua iloa e Esau lenā mea, na matuā ita o ia ma taumafai ai e fasioti lona uso masaga. Na mananaʻo Isaako ma Repeka e puipui Iakopo. O lea na la fai atu ai iā te ia: ʻIa e alu ma nofo iā Lapana le tuagane o lou tinā, seʻia tau teʻa le ita o Esau.’ Na usitaʻi Iakopo i ona mātua, ma sola ese ai ina ia faasaoina lona ola.