Isak ben abi 40 yari di a trow nanga Rebeka èn a ben lobi Rebeka. Bakaten den kisi tu boi. Den ben de wan twelengi.

A fosiwan den ben kari Esau èn a moro yonguwan na Yakob. Esau ben lobi fu de na dorosei èn a ben de wan bun ontiman. Ma Yakob ben lobi tan na oso.

Na ini a ten dati, a gwenti ben de taki te a papa dede, a fosi boi ben e kisi a moro bigi pisi fu a gron nanga a moni fu a papa. Na dati den ben e kari a famirigudu. Ma boiti den gudu dati, a famiri fu Isak ben o kisi ete wan tra gudu. A gudu dati na den sani di Yehovah ben pramisi Abraham. Esau no ben e span nanga den pramisi dati, ma Yakob ben sabi taki den pramisi dati ben prenspari.

Wan leisi di Esau kon na oso, a ben weri kefalek fu di a ben onti heri dei. Di a smeri a switi nyanyan di Yakob ben e bori, a taki: ’Angri e kiri mi! Gi mi pikinso fu a redi sani di yu e bori!’ Yakob taigi en: ’Pramisi mi fosi taki yu o gi mi a reti di yu abi leki a fosi pikin.’ Esau piki en: ’Mi no e span nanga a famirigudu! Yu kan teki en. Na nyan mi musu nyan.’ Yu denki taki na wan koni sani Esau du? Nôno, a no wan koni sani a du. Esau seri a warti gudu di a ben abi, gi wan preti nyanyan.

Di Isak kon owru, a ten ben doro taki a ben musu blesi a fosi manpikin fu en. Ma Rebeka  yepi Yakob, a moro yongu manpikin, fu kisi a blesi dati. Di Esau kon yere san pasa, en ati bron srefisrefi èn a ben wani kiri en brada. Fu di Isak nanga Rebeka ben wani kibri Yakob, meki den taigi en: ’Lowe go na yu mama brada, Laban, èn tan drape teleki Esau ati kowru.’ Yakob arki en papa nanga en mama èn a lowe, so taki Esau no kiri en.