Su tempong Ishak umure 40 su taunge, i sie nẹ̌kawing dingangi Ribka. I sie sěbạe masayang si Ribka. I rẹ̌dua nakaěbạ ana esẹ kěmbarẹ̌.

Sěmbaụ arenge Esau, kụ tuarine arenge Yakub. Esau tawe masau ene su wal᷊e kụ i sie jago měnamẹ binatang. Katewe i Yakub puluang mẹ̌tanạ su wal᷊e.

Su zaman ene, anạ kaiakanenge sarung makaěbạ kaguwạkenge ěntana dingangu roitẹ̌ mạeng i papạe seng nate. Ene nisěbạ pusakạ. Su kěluargang i Ishak, dianding i Yehuwa si Abraham ene nakoạ pusakạ. Esau tawe tumanịu mapadul᷊i su diandi ene, katewe Yakub masingkạ diandi ene penting.

Piạ su sahěllo, Esau sěbạe nal᷊owe ual᷊ingu sahěllo i sie nědeạ binatang. Su tempong nahumpạ su wal᷊e, i sie nakaimbu kaěng nisasạ i Yakub sěbạe matemang kụ i sie naul᷊ị, ’Iạ nahutung-hutung! Gělịko si siạ gul᷊ẹ mahamụ ene!’ Yakub naul᷊ị, ’Iạ měgělị, katewe i kau harusẹ̌ pẹ̌diandi kal᷊imona i kau sarung měgělị pusakạu si siạ.’ Esau naul᷊ị, ’Al᷊ạe, iạ tawe mapadul᷊i su pusakạku! Iạ kětạeng mapulu kumaěng.’ Tumuhụ si kau, apa kakanoạ i Esau ene matahuěna? Tala. Esau něnukarẹ̌ barang sěbạe maarěga kětạeng dingangu sěmbohogẹ̌ gul᷊ẹ.

 Su tempong i Ishak seng maghurang, i sie mapulu měgělị al᷊amatẹ̌ su anạ kaiakanenge. Katewe i Ribka nẹ̌tul᷊ung si Yakub, anạe tuari, gunang makaěbạ al᷊amatẹ̌ ene. Su tempong i Esau nakasingkạ, i sie sěbạe nẹ̌pědu kụ mapulu měmate tuarine. Ishak dingangi Ribka mapulu měndiagạ si Yakub, hakị u ene i sire naul᷊ị si Yakub, ’Dakọe sarang anung i Laban, kakạ i mamạ, kụ pẹ̌tanạ sene sarang i Esau seng tawe mẹ̌pědu.’ Yakub dimaringihẹ̌ su matimade kụ i sie timal᷊ang.