Chiindi Izaka naakakwata Ribbekka, wakali aminyaka iili 40. Izaka wakali kumuyanda loko Ribbekka. Mukuya kwachiindi, bakazooba abana balombe babili, mayanga.

Mupati wakali Esawu alimwi muniini wakali Jakkobo. Esawu taakali kuyanda zyakukkala ang’anda alimwi wakali mumvwimi. Pesi Jakkobo wakali kuyandisya kukkala ang’anda.

Muchiindi eecho, mwana mutaanzi wakali kupegwa nyika yakulima amali, kuti wisi wafwa. Eezi zyakali kwaambwa kuti ndukono. Mumpuli yaIzaka, lukono lwakali kuswaanizya zisyomezyo Jehova nzyaakaamba kuli Abrahamu. Esawu taakali kuzibikkila maanu zisyomezyo zyaJehova, pesi Jakkobo wakalizi kuti zilayandikana.

Limwi zuba Esawu wakasika ang’anda kakatede kazwa kukuvwima. Wakamvwa kununkilila kwachakulya chakali kujikwa aJakkobo, mpawo wakati: ‘Ndaba anzala! Ndikumbila musinza uusalala!’ Jakkobo wakati: ‘Ndilakupa kuti wasaanguna kundiwuzizya bupati bwako.’ Esawu wakati: ‘Bupati oobu bulandigwasyaanzi? Ndilakonzya kukupa. Ndafwa anzala.’ Ubonaanga zili kabotu na zyakachitwa aEsawu? Tazili kabotu pe. Esawu wakachinchanisya chintu chiyandikana loko amusinza luzutu!

Chiindi Izaka naakachembaala, wakayanda kulongezya mwanaakwe mupati. Pesi Ribbekka wakagwasya Jakkobo kuti ajane chilongezyo  eecho. Chiindi Esawu naakaziba, wakanyema zyakuti wakayanda kujaya mwanike wakwe. Izaka aRibbekka bakali kuyanda kukwabilila Jakkobo, nkinkaako, bakamubuzya kuti: ‘Yinka ukakkale awusolenzi, Labani, kusikila Esawu akaleke kukunyemena. Jakkobo wakaswiilila bazyali bakwe alimwi wakachija.