Isaka o vha e na miṅwaha ya 40 musi a tshi vhinga Rebeka. O vha a tshi mu funa vhukuma. Nga u ya ha tshifhinga, vha beba vharwa vhavhili—mafhaṱa.

Ṅwana wa mutukana wa u thoma a vha a tshi pfi Esau nahone muṱuku a pfi Yakobo. Esau o vha a tshi takalela u dzula e nnḓa nahone o vha a tshi kona nga maanḓa u zwima zwipuka. Yakobo o vha a tshi funa u dzula e hayani.

Tshifhingani tshenetsho, ṅwana wa u thoma wa mutukana o vha a tshi fhiwa tshipiḓa tshihulwane tsha tsimu na tshelede musi khotsi awe vha tshi fa. Zwenezwo zwo vha zwi tshi vhidzwa ifa. Muṱani wa Isaka, ifa ḽo vha ḽi tshi katela na u vha tshipiḓa tsha mafulufhedziso e Yehova a ita na Abrahamu. Esau ho ngo dzhiela nṱha eneo mafulufhedziso, fhedzi Yakobo o vha a tshi zwi ḓivha uri ndi a ndeme vhukuma.

Ḽiṅwe ḓuvha, Esau o vhuya hayani o neta vhukuma a tshi bva u zwima. A pfa zwiḽiwa zwavhuḓi zwe Yakobo a vha a tshi khou zwi bika zwi tshi khou nukhelela nahone a ri: ‘Ndi na nḓala vhukuma! Mpheni-vho tshidzimba tshitswuku!’ Yakobo a ri: ‘Ndi ḓo ni fha, fhedzi thomani ni mpfulufhedzise u ri ni ḓo nṋea ifa ḽaṋu.’ Esau a ri: ‘Ifa heḽi a si ḽa ndeme kha nṋe! Ni nga ḽi dzhia. Nṋe ndi khou ṱoḓa zwiḽiwa fhedzi.’ Naa ni humbula uri Esau o ita zwithu nga vhuṱali? Na khathihi. Esau o ṋeela nga tshithu tsha ndeme vhukuma, nga nṱhani ha ndilo ya tshidzimba fhedzi.

Isaka o vha o no aluwa vhukuma nahone tsho vha tshi tshifhinga tsha u ṋea phaṱutshedzo ṅwana wawe wa mutukana wa u thoma. Fhedzi Rebeka o thusa Yakobo, murwa muṱuku, uri a  wane yeneyo phaṱhutshedzo. Musi Esau a tshi zwi wanulusa, o mbo ḓi sinyuwa vhukuma nahone a ṱoḓa u vhulaya murathu wawe. Isaka na Rebeka vha tsireledza Yakobo nahone vha ri khae: ‘Ṱuwani ni ye u dzula na khaladzi a mme aṋu, Labani, u vhuya u swika mbiti dza Esau dzi tshi fhela.’ Yakobo o thetshelesa vhabebi vhawe nahone a shavha.