Isaakeʼ yaan 40 años tiʼ ka tsʼoʼok u beel yéetel Rebeca. Letiʼeʼ jach u yaabiltmaj kaʼachi. Ka máan kʼiineʼ anchaj kaʼatúul u paalaloʼob, gemeloʼob.

Le maas nojochoʼ tu kʼaabaʼtaj Esaú, le chichnoʼ Jacob. Esaueʼ jach uts tu tʼaan kaʼach u bin kʼáax yéetel jach u yojel tsʼoon. Chéen baʼaleʼ Jacobeʼ maas uts tu tʼaan u yantal kaʼach tu yotoch.

Teʼ kʼiinoʼob jeʼeloʼ tiʼ le sukuʼuntsil ku tsʼaʼabal u maas yaʼabil le kʼáaxoʼob yéetel taakʼin ken tʼoʼoxok le herencia tumen le taatatsiloʼ. Le herencia unaj u tsʼáaik Isaak tiʼ u paalaloʼ táakaʼan xan le promesaʼob u beetmaj Jéeoba tiʼ Abrahanoʼ. Utiaʼal Esaueʼ mix baʼal u biilal le promesaʼobaʼ. Chéen baʼaleʼ utiaʼal Jacobeʼ jach koʼoj u tojol.

Juntéenjeakeʼ jach kaʼanaʼan Esaú ka suunaji, tumen bul kʼiin táan u máan u kaxt baʼal u tsʼone. Ka kʼucheʼ tu yuʼubaj jach kiʼibok le janal ku chakik Jacoboʼ, ka tu yaʼalajtiʼ: ‹¡Jach tin kíimil yéetel wiʼij! ¡Tsʼáaten junpʼíit tiʼ le chak janaloʼ!›. Jacob túuneʼ tu yaʼalajtiʼ: ‹Maʼalob, pero táanileʼ jurartten yaan a pʼatikten a herencia›. Esaueʼ tu núukajtiʼ: ‹¡Maʼ kʼaʼabéetten le herenciaoʼ! Pʼáataktech. Teneʼ le baʼax in kʼáatoʼ janal›. ¿A tuklikeʼ yaan wa u naʼat Esaú úuchik u beetik lelaʼ? Minaʼan. Tu kʼexaj u herencia yéetel junpʼéel plato janal.

Le tsʼoʼok u jach chʼíijil Isaakoʼ, kʼuch u yorail u bendecirtik le u yáax hijooʼ. Chéen baʼaleʼ Rebecaeʼ tu yáantaj Jacob, le íitsʼintsiloʼ, utiaʼal  ka bendecirtaʼak tumen u papá. Ka tu yojéeltaj Esaú lelaʼ jach pʼuʼuji ka tu tuklaj u kíimsik Jacob. Isaak yéetel Rebecaeʼ taak u kanáantkoʼob kaʼach Jacob, le oʼolal tu yaʼaloʼobtiʼ: ‹Xeen, yéetel pʼáatkech tu yiknal a tío Labán, u sukuʼun a maama. Pʼáatkech teʼeloʼ hasta ken máanak u pʼujaʼanil Esaú›. Jacobeʼ tu beetaj le baʼax aʼalaʼabtiʼ tumen u papaʼoboʼ, le oʼolal púutsʼ utiaʼal maʼ u kíimsaʼal tumen u sukuʼun.