Napa Isaac 40 iza dxi bichaganáʼ Rebeca. Guizáʼ gunnaxhii Isaac laabe. Despué gúpacabe chupa hombrehuiiniʼ, cuachi.

Baʼduʼ primé que biree lá Esaú ne guiropa que biree lá Jacob. Nabé guyuulaʼdxiʼ Esaú cheʼ ndaaniʼ guiʼxhiʼ para guinaazeʼ maniʼ guiʼxhiʼ. Peru Jacob jma guyuulaʼdxiʼ guiaana ra yoo.

Tiempu que, ora gatiʼ bixhoze binni, baʼduʼ primé stiʼ nga ricaa jma xiroobaʼ layú ne jma stale bueltu que xcaadxi. Laani nga rábicabe herencia. Para familia stiʼ Isaac la? tobi de ca herencia que nga gácacabe parte de ca promesa ni biʼniʼ Jiobá Abrahán. Para Esaú qué risaca ca promesa riʼ. Peru para Jacob la? risaca cani stale.

Ti biaje, despué de guyé Esaú yenaazeʼ maniʼ guidubi dxi ora bibiguetaʼ guizáʼ maʼ bidxaga. Málasi guyuuxiibe candáʼ naxhi guendaró ni cayuni Jacob, óraque nabe: «¡Guizáʼ maʼ candaanaʼ! ¡Dané naa caadxi guendaró xiñáʼ ca!». Para ná Jacob rabi laabe: «Zudieeʼ ni lii, peru primeru gudxi naa zudiiluʼ naa herencia stiluʼ». Óraque ná Esaú: «Gucuaa ni, ¡xi guneʼ herencia ca yaʼ! Maʼ candaanaʼ ndiʼ». ¿Ñee rábiluʼ nuu xpiaaniʼ Esaú pur ni biʼniʼ ca la? Coʼ, nin ti ndaahuiiniʼ. Bicaanabe ti cosa nabé risaca pur ti bladuʼ guendaró.

 Dxi maʼ nagola Isaac, bedandá ora cuʼ ndaayabe primé xiiñibe. Peru gucané Rebeca Jacob, guiropa xiiñicabe, para cuʼ Isaac ndaayaʼ laa. Ora gunna Esaú ni, guizáʼ bidxiichi ne biyubi modo guuti biʼchiʼ. Cumu qué racalaʼdxiʼ Isaac ne Rebeca guizaaca Jacob gastiʼ la? gúdxicabe laa: «Guyé ra lidxi xtiuluʼ Labán, bizaʼnaʼ jñaaluʼ, biaana raqué dede ora tiidiʼ xiana stiʼ Esaú». Bizuubaʼ Jacob stiidxaʼ jñaa ne bixhoze ngue runi bixooñebe para cadi guuti bíʼchibe laabe.