Garã Yisaka adu nga 40 ho ko adi Rebeka ni. Ko akpinyemuri ni bakerehe. Fuo bete regbo kusa, i abatika agude ue nga abi ni akumbagude.

Rimo unvuru angia Esau, na tame ki ngia, Yakobo. Esau aima kpinyemu ta, na ko angia wene bamangi anya. Ono Yakobo anaaida kaa sungo kporo tigako.

Ti agu aregbo re, i anaafu bakere dagbangua na marã fu gu gude nga unvuru ka bani kpi. I anaayamba ha nga ũkumbo. Rogo gu ngbadimokporo nangia ga Yisaka, gu ũkumbo re anaakoda agu akidohe a Yekova akido Abarayama na ni. Pa agu akidohe re aanyakanga gbe bangiri Esau te, ono Yakobo aima inoho nga si na nyanyakipaha.

Rogo uru sa Esau ayego gene manga anya yo ki du na bakere mbugo. Ko agi fuõ gu wene riahe Yakobo aamangaha ki ya: ‘Mi nakpi be gomoro! Mo fu bete gu zamba riahe re fere!’ Yakobo ki ya: ‘Mi nika fuhe afu, ono mo kido re mbata nga mi nika dia gamu ũkumbo.’ Esau ki ya: ‘Sunge tire na ũkumbo te! Mo dihe adia. Mi naida ka rihe.’ Ya mo mo nabihe nga patatamana du Esau amangihe re? Oó, wagusa te. Esau ambupa guhe paha aima nyaka, tipa riahe gbua.

Ho Yisaka agbinza ni gbe, regbo ada tipa ko fu maku fu gu wiriko nangia unvuru. Ono Rebeka aundo Yakobo nangia tame ko di gu  maku re. Ho Esau ainihe ni, ko adu na bakere zinga ki idi ka imo tameko. AYisaka na Rebeka aaida ka banda Yakobo, sidu, i ki ya fuko: ‘Mo guari ki ndu ka sungo na andomo nga Rabana, daho ngbadu Esau ka zera ni.’ Yakobo adegetuko kuti gu rugute avunguko afuhe fuko na ko ki oro ka batasa ungako.