Jehová Diosajj Jacobur akham sänwa: ‘Kunjamtï Abrahanarusa Isaacarusa jan walinakat jarkʼaqkayätjja ukhamarakiw jumar jarkʼaqäma’ sasa. Jacobojj Harán sat lugaranwa jakasïna, ukanwa casarasirakïna. Jupajj walja wawanakanïnwa, wali qamirirakïnwa.

Tiempompejja, Jehová Diosajj Jacobur akham sänwa: ‘Oraqemar kuttʼjjam’ sasa. Ukatwa Jacobumpi familiapampejj viajiñ qalltapjjäna. Thakinjja, akham sasaw yatiyapjjäna: ‘Esaú jilamajj 400 chachanakampiw jutaski’ sasa. Jacobojj wal ajjsarayasïna, ‘Esaú jilajajj nayarus familiajarus jan walinak lurapjjetaspa’ sasaw säna. Ukatwa Jehová Diosar akham sasin mayisïna: ‘Mirä amp suma, jilajat salvakitaya’ sasa. Qhepürusti, Jacobojj regalonakwa Esaú jilapar apayäna: walja ovejanaka, cabranaka, vacanaka, camellonaka, asnonaka.

Uka arumajja Jacobojj sapakiskäna ukhaw mä angelar uñjäna. Jacobusti uka angelat wal katuntasïna, angelasti dejayasiñatakiw chʼamachasirakïna, qhantatkamaw ukham waynaqtapjjäna. Angelajj Jacobur usuchjkchïnsa katuntaskakïnwa. Angelajj ‘jan katjjäsistati’ sasaw säna. Ukampis Jacobojj akham sänwa: ‘Bendisitäta ukhakiw antutäma’ sasa.

Ukatwa angelajj Jacobur bendisïna. Uka bendición katoqasaw Jacobojj ‘Jehová Diosaw Esaú jilajat jarkʼaqetani’ sasin confiyäna.

 Uka alwajja, Jacobojj Esaú jilaparusa 400 chachanakarus jayat uñjäna. Ukatsti Esaú jilapampi jikisirejj familiapat nayra saräna, purisajj paqallq kutiw jilap nayraqatar oraqer puriñkam altʼasïna. Esaú jilapajj Jacobun ukaruw tʼijüna, qhomantarakïnwa. Panipaw jachapjjarakïna, ukatsti sumankthapipjjänwa. ¿Jacobun ukham luratapajj Jehová Diosar gustpachänti?

Uka qhepatjja, Esaú chachajj utaparuw kuttʼjjäna, Jacobusti kawkirutï sarañapäkäna ukarojj saraskakïnwa. Jacobojj 12 wawanakanïnwa, sutinakapajj akanakänwa: Rubén, Simeón, Leví, Judá, Dan, Neftalí, Gad, Aser, Isacar, Zabulón, José, Benjamín. Qhepatjja, Jacobun José sat yoqap taypiw Jehová Diosajj markapar salväna. ¿Kunjamas ukajj pasäna uk yattati? Uk yatjjatañäni.